ट्रान्सफॉर्मर जळाला तर महावितरणला कळवा*
यवतमाळ / प्रतिनिधी
रब्बी हंगामात शेतीला सुरळीत वीज पुरवठा देण्यासाठी महावितरण प्रयत्नशील आहे. परंतू काही कारणास्तव ट्रान्सफॉर्मर बिघडला असेल आणि महावितरणला ट्रान्सफॉर्मर बिघडल्याची खबर मिळाल्यानंतर कमाल तीन दिवसात ट्रान्सफॉर्मर बदलण्यात येत आहे. तथापि, ट्रान्सफॉर्मर जळाला आहे, हेच उशीराने समजले तर प्रत्यक्षात वीज पुरवठा पुन्हा सुरू होण्यास अधिक विलंब लागतो याची जाणीव ठेवून महावितरणने तत्पर सेवेसाठी एक पाऊल पुढे करत स्थानिक शेतकऱ्यांनी ट्रान्सफॉर्मर नादुरूस्त झाल्याची माहिती महावितरणला कळविण्याचे आवाहन मुख्य अभियंता ज्ञानेश कुलकर्णी यांनी केले आहे.
त्यासाठी महावितरणकडून यवतमाळ जिल्ह्यातील ग्राहकांसाठी जिल्हा पातळीवर कार्यरत असलेल्या कंट्रोल रूमचा 7875763099 हा मोबाईल नंबर उपलब्ध करून देण्यात आला आहे.महावितरणने उपलब्ध करून देण्यात आलेल्या कंट्रोल रूमशी काही कारणास्तव संपर्क होत नसल्यास जिल्ह्यातील ग्राहकांनी कार्यकारी अभियंता (प्रशासन) यांना 7875763024 या क्रमांकावर खबर देता येईल. त्यासोबत या व्हॉट्स ॲप नंबरवर जळालेल्या ट्रान्सफॉर्मरचा फोटो आणि ठिकाणाचा तपशील कळविता येईल.
गावातील ट्रान्सफॉर्मर जळाला तर विद्युत पुरवठा खंडित होऊन गावकऱ्यांची गैरसोय होते. जळालेल्या ट्रान्सफॉर्मरच्या जागी दुरुस्त ट्रान्सफॉर्मर बसविण्यास होणारा विलंब टाळण्यासाठी महावितरणने सातत्याने प्रयत्न चालविले आहेत. त्यासाठी ट्रान्सफॉर्मर ऑईल तातडीने उपलब्ध करणे, दुरुस्त ट्रान्सफॉर्मरचा साठा तयार करणे असे विविध उपाय केले आहेत. ट्रान्सफॉर्मर बदलणे व दुरुस्त करणे याचा आढावा मुख्यालय स्तरावर दररोज घेण्यात येतो.
या मोहिमेला यश आले असून महावितरणला ट्रान्सफॉर्मर बिघडल्याची खबर मिळाल्यानंतर कमाल तीन दिवसात ट्रान्सफॉर्मर बदलण्यात येत आहे. तथापि, ट्रान्सफॉर्मर जळाला आहे, हेच उशीराने समजले तर प्रत्यक्षात वीज पुरवठा पुन्हा सुरू होण्यास अधिक विलंब लागत असल्याची समस्या जाणवत आहे. यावर मात करण्यासाठी वीज ग्राहकांनी महावितरणला सहकार्य करावे, असे आवाहन करण्यात येत आहे.
जळालेल्या ट्रान्सफॉर्मरच्या जागी दुरुस्त ट्रान्सफॉर्मर बसवून लवकरात लवकर वीज पुरवठा पुन्हा सुरू करण्याच्या महावितरणच्या मोहीमेस वीज ग्राहकांनी सहकार्य करावे आणि ट्रान्सफॉर्मर बिघडल्याची खबर तत्पर द्यावी, असे आवाहन करण्यात येत आहे.
