बापरे……. पोलिसांना सट्टा नेटवर्क वर केलेल्या कारवाईत मिळाले कोट्यवधीचा माल 

  झाशी / विशेष प्रतिनिधी

              पोलिसांनी झाशी येथे गुप्त सूचनेच्या आधारावर केलेल्या कारवाईत दीड कोटी रुपयांचे सोने, 11 लाख रुपयांची चांदी आणि 19 लाख रुपयांची रोकड जप्त केली आहे. हा छापा एका सट्टा नेटवर्क वर टाकण्यात आला होता.

याप्रकरणी पोलिसांनी यशस्वी आणि निशा खान नावाच्या दोन महिलांना अटक केली असून, यशस्वी ही उत्तर प्रदेश पोलीस दलातील शिपाई रजत याची प्रेयसी असल्याचे समोर आले आहे. मुख्य आरोपी शिपाई रजत सध्या फरार असून, अटक करण्यात आलेल्या यशस्वीच्या आईने आपल्या मुलीच्या या अवस्थेला शिपाई रजतला जबाबदार धरत अनेक धक्कादायक खुलासे केले आहेत. या कारवाईमुळे पोलीस दलात मोठी खळबळ उडाली असून फरार शिपायाचा शोध घेण्यासाठी पथके रवाना करण्यात आली आहेत.

शिपायाने अल्पवयीन असतानाच प्रेमाच्या जाळ्यात ओढलं

यशस्वीची आई सुमन यांनी दिलेल्या माहितीनुसार, त्यांची मुलगी आणि शिपाई रजत गेल्या 8 वर्षांपासून लिव्ह-इन रिलेशनशिपमध्ये होते. रजतने यशस्वी अल्पवयीन असतानाच तिला आपल्या प्रेमाच्या जाळ्यात ओढले होते. विशेष म्हणजे, रजत आणि यशस्वीचे वडील एकाच पोलीस चौकीत तैनात होते, ज्यामुळे रजतचे त्यांच्या घरी नेहमी येणे-जाणे असायचे. यशस्वी कॉलेजला जात असताना रजत तिला भेटायचा. आईने असाही आरोप केला आहे की, रजत आधीच विवाहित असून त्याला दोन मुले आहेत, परंतु ही बाब त्याने यशस्वीपासून लपवून ठेवली आणि तिला फसवून तिच्याशी संबंध ठेवले. लग्नाचे खोटे आमिष दाखवून रजतने यशस्वीला केवळ आपल्या काळ्या धंद्यासाठी आणि छंदासाठी वापरल्याचा संताप तिच्या आईने व्यक्त केला आहे.

पीएसआय बनण्याचे स्वप्न भंगले; बदनामीच्या भीतीने यशस्वी हादरली

यशस्वी ही अभ्यासात अत्यंत हुशार होती आणि तिला पोलीस विभागात पीएसआय बनण्याची इच्छा होती. जेव्हा कुटुंबाला या प्रेमसंबंधाची माहिती मिळाली, तेव्हा त्यांनी तिचे लग्न दुसरीकडे ठरवले होते आणि तिचा साखरपुडाही झाला होता. मात्र, रजतच्या प्रेमात पडलेल्या यशस्वीने तो साखरपुडा मोडला आणि आपण कोणाचे आयुष्य खराब करू इच्छित नाही, असे स्पष्टपणे आपल्या आईला सांगितले. आता अटक झाल्यानंतर यशस्वी प्रचंड मानसिक तणावाखाली असून तिला समाजातील बदनामीची भीती वाटत आहे. तिने आपल्या आईला सांगितले की, इतक्या बदनामीनंतर ती कोणालाही तोंड दाखवू शकणार नाही. मुलीची ही अवस्था पाहून आईने सांगितले की, रजतने तिला अडचणीत सोडून पळ काढला आहे, जे त्याच्या खोट्या प्रेमाचे जिवंत उदाहरण आहे.

छापेमारीच्या वेळी शिपायाचे पळ काढणे; आईचे गंभीर आरोप आणि पोलीस तपास

आई सुमन यांच्या म्हणण्यानुसार, छापेमारीच्या दिवशी संध्याकाळी साडेसहा वाजेपर्यंत रजत तिथेच होता, मात्र पोलिसांना पाहताच तो यशस्वीला एकटे सोडून पसार झाला. जर त्याचे तिच्यावर खरे प्रेम असते, तर त्याने तिला असे संकटात टाकले नसते. यशस्वीने रजतवर आंधळा विश्वास ठेवला आणि त्यासाठी आपल्या आई-वडिलांचा विश्वास अनेकदा तोडला, ज्याची शिक्षा आज ती भोगत आहे. दरम्यान, झाशी पोलीस आता फरार शिपाई रजत आणि या सट्टा टोळीतील इतर सदस्यांचा शोध घेत आहेत. पोलिसांनी जप्त केलेल्या मालमत्तेची व्याप्ती पाहता, हे रॅकेट आंतरराज्य स्तरावर पसरलेले असण्याची शक्यता वर्तवण्यात येत आहे. प्रशासनाने स्पष्ट केले आहे की, कायद्याचे उल्लंघन करणाऱ्या कोणत्याही कर्मचाऱ्याला बक्षले जाणार नाही.