क्राइम
ती सगळ्यांना सांगायची तो ऑस्ट्रेलियाला गेला आहे,पण सत्य मात्र वेगळंच
जामनगर (गुजरात ) / विशेष प्रतिनिधी
जामनगर (गुजरात) येथून एक काळजाचा थरकाप उडवणारी बातमी समोर आली आहे. येथे बायकोने आपल्या नवऱ्याची प्रियकर आणि मित्राच्या मदतीने हत्या करून मृतदेह फॅक्टरीत पुरला. नवऱ्याबद्दल विचारणा करणाऱ्याला ती नवरा ऑस्ट्रेलियात गेला आहे असे सांगायची. अनेक प्रयत्नां नंतर देखील त्याचा मोबाईल नंबर देण्यास टाळाटाळ होत असल्याने कुटुंबीयांना संशय आला. त्यांनी पोलिसात तक्रार दाखल केली.पोलिसांनी तपास सुरू केला तेव्हा बायकोने नवऱ्याचा ‘ दृश्यम ‘ स्टाईल खून केल्याचे समोर आले आहे. पोलिसांनी महिलेचा प्रियकर आणि त्याच्या मित्राला अटक केली आहे.
पत्नी, तिचा कथित प्रियकर आणि त्याच्या एका मित्राने मिळून पतीची हत्या करून त्याचा मृतदेह तब्बल 12 फूट खोल खड्यात पुरून त्यावर काँक्रीटचा जाड थर टाकल्याचा आरोप आहे.
पोलिसांनी काँक्रीट फोडून सांगाडा बाहेर काढला
पोलिसांनी कारखान्याच्या परिसरातील काँक्रीट फोडून सांगाडा बाहेर काढला असून तो जिग्नेश मावडिया याचाच असल्याचा संशय व्यक्त करण्यात आला आहे. मृताची ओळख निश्चित करण्यासाठी सांगाडा तज्ज्ञांकडे तपासणीसाठी पाठवण्यात आला आहे. या प्रकरणात पृथ्वी उर्फ भूमिबेन, तिचा कथित माजी प्रियकर निलेश कच्छटिया आणि त्याचा मित्र बलवीर वर्मा यांना अटक करण्यात आली आहे.
पती कामासाठी ऑस्ट्रेलियाला गेल्याची स्टोरी, पण सत्य वेगळंच
पोलिसांच्या माहितीनुसार, जिग्नेश बेपत्ता झाल्यानंतर जवळपास दोन वर्षे पृथ्वीने आपल्या पतीने कामासाठी ऑस्ट्रेलियात स्थलांतर केल्याची स्टोरी नातेवाईकांना सांगितली होती. त्याच्या कंपनीचे नियम कडक असल्यामुळे तो फोनवर बोलू शकत नसल्याचे कारणही ती देत होती. मात्र, ऑस्ट्रेलियाला जाण्याची तयारी करणाऱ्या जिग्नेशच्या एका चुलत भावाने त्याचा पत्ता आणि संपर्काची माहिती मागितल्यानंतर पृथ्वी ती देऊ शकली नाही. तिच्या सततच्या टाळाटाळीमुळे कुटुंबीयांच्या मनात संशय निर्माण झाला. अखेर जिग्नेशच्या भावाने यावर्षी 26 जुलै रोजी पोलिसांकडे तक्रार दाखल केली.त्यानंतर पोलिसांनी तपास सुरू केला आणि त्यातून हे प्रकरण उघडकीस आल्याचा दावा करण्यात आला.
12 फूट खोल पुरलेला सांगाडा सापडला
तपासादरम्यान पोलिसांनी आरोपींची चौकशी करून गुन्ह्याची घटनास्थळी पुनर्रचना केली. त्यानंतर कारखान्याच्या परिसरात संशयित जागेवर उत्खनन करण्यात आले. जवळपास एक फूट जाडीचा काँक्रीटचा थर असल्यामुळे तो फोडण्यासाठी विशेष यंत्रांचा वापर करावा लागल्याचे पोलिसांनी सांगितले. काँक्रीटचा थर हटवल्यानंतर सुमारे 12 फूट खोल पुरलेला सांगाडा सापडला. पोलिसांच्या म्हणण्यानुसार, 31 मे 2024 च्या रात्री आरोपींनी जिग्नेशला दारू पार्टीचे आमिष दाखवून एका औद्योगिक शेडमध्ये बोलावले. तेथे सायनाइड मिसळलेली दारू पाजून त्याची हत्या करण्यात आली. त्यानंतर मृतदेह खड्यात पुरून त्यावर माती टाकण्यात आली आणि संपूर्ण जागा काँक्रीटने टाकण्यात आली आणि संपूर्ण जागा काँक्रीटने झाकण्यात आली, असा आरोप आहे.
पोलिसांनी सांगितले की, मृताची ओळख निश्चित करण्यासाठी सांगाडा न्यायवैद्यक तपासणीसाठी पाठवण्यात आला असून त्याचा अहवाल आल्यानंतर पुढील प्रक्रिया केली जाणार आहे. आरोपींविरूद्ध खून, पुरावे नष्ट करणे आणि इतर संबंधित कलमांनुसार गुन्हा दाखल करण्यात आला आहे. या प्रकरणातील संपूर्ण घटनाक्रम स्पष्ट करण्यासाठी तसेच आणखी पुरावे गोळा करण्यासाठी तपास सुरू असल्याचे पोलिसांनी सांगितले आहे. या प्रकरणामुळे परिसरात मोठी खळबळ उडाली असून तब्बल दोन वर्षे बेपत्ता व्यक्तीबाबत दिशाभूल केल्याचा आरोप आणि त्यानंतर उघड झालेला कथित कट चर्चेचा विषय ठरला आहे!
