लाखनी तालुक्यातील मोगरा येथील घटना.
मारेकऱ्याचे लाखनी पोलिसांत आत्मसमर्पण.
भंडारा प्रतिनिधी
अनैतिक संबंधातून गावातीलच तरुणाने विधवा महिलेचा नॉयलॉन दोरीने गळा आवळून निघृणपणे खून केल्याची घटना लाखनी पोलीस ठाण्याच्या हद्दीतील ग्राम. मोगरा/शिवणी येथे दि. २१ मार्च रोजी दुपारी ३ वाजतादरम्यान घडली. पुष्पा रामेर्श्वर बनकर (३७) रा. मोगरा/शिवणी, ता. लाखनी, असे मृतक महिलेचे नाव असून खुशाल पुरुषोत्तम पडोळे (२७) रा. मोगरा, ता. लाखनी, असे आरोपी तरुणाचे नाव आहे.
या घटनेतील मृतक व आरोपी एकाच गावातील रहिवासी आहेत. मृतक पुष्पा बनकर ही भाजीपाल्याचा व्यवसाय करून आपल्या २ मुलांचा सांभाळ करीत होती. गत काही वर्षांपूर्वी तिच्या पतीने गळफास घेऊन आत्महत्या केली. होती. दरम्यान शुक्रवारी दुपारच्या सुमारास आरोपी खुशाल पडोळे याने तिला शेतशिवारातील नाल्याकडे बोलावले आणि नंतर आरोपीने रस्सीने गळा आवळून तिचा निघृणपणे खून केला. मृतक पुष्पा व आरोपीचे मागील अडीच वर्षांपासून अनैतिक संबंध असल्याची माहिती समोर येत आहे. मोगरा येथील नाल्याजवळ मृतक महिलेचे शेत आहे. शेतात उन्हाळी धान पिकाची लागवड केली आहे. घटनेच्या दिवशी मृतक महिला ही शेतात धान पिकाची पाहणी करण्यासाठी गेली होती. थोड्या वेळाने आरोपी तिथे गेला. या दरम्यान दोघात वाद झाला. या वादातून आरोपीने मृतकाच्या शेतालागत असलेल्या सागवनाच्या वाडीत दोरीने गळा आवळून विधवेचा निघृणपणे खून केला. यानंतर आरोपीने लाखनी पोलीस ठाणे गाठले व हत्येची कबुली दिली. लगेच पोलीस घटनस्थळी दाखल झाले व घटनेचा पंचनामा करून मृतदेह उत्तरीय तपासणीसाठी ग्रामीण रुग्णालय लाखनी येथे पाठविले. घटनेचे गांभीर्य ओळखून अप्पर पोलीस अधिक्षक ईश्वर कातकडे, उपविभागीय पोलीस अधिकारी आनंद चव्हान, पोलीस निरीक्षक हृदयनारायण यादव व लाखनी पोलीस ठाण्याची चमू घटनास्थळी दाखल झाली होती. प्रकरण गंभीर असल्याने फॉरेन्सिक चमूला पाचारण करण्यात आले होते. वृत्त लिहीपर्यंत लाखनी पोलीस ठाण्यात गुन्हा दाखल करण्याची प्रक्रिया सुरू होती.
