गर्भवती पत्नीच्या देखभाली साठी आणलेल्या तरुणीसोबत अनैतिक सबंध अन्…..

विशाखापट्टणम / विशेष प्रतिनिधी

                     पत्नी गर्भवती असल्याने त्याने तिच्या देखभाली साठी एका तरुणीला आणले. तरुणी आणि त्याच्यात अनैतिक सबंध स्थापित झाले. पत्नी माहेरी गेल्यावर तिने त्याच्या वर लग्नासाठी दबाव टाकणं सुरू केले. संतापलेल्या त्याने तिचा खून केला. मृतदेह सुटकेस मध्ये भरून ओडिशा राज्यातील निर्जन स्थळी फेकून दिला.पण त्याची ही खबरदारी काहीच कामी आली नाही.आणि तो पकडल्या गेला.

विशाखापट्टणमच्या कंचारपालम येथील दुर्गा नगरमध्ये राहणाऱ्या एका कारचालकाने आपल्या प्रेयसीची निर्घृण हत्या केल्याचा आरोप आहे. हत्या केल्यानंतर पुरावे नष्ट करण्याच्या उद्देशाने आरोपीने महिलेचा मृतदेह एका मोठ्या सुटकेसमध्ये भरला. त्यानंतर कोणाचाही संशय येऊ नये म्हणून तो सुटकेस रेल्वेने शेजारील ओडिशात घेऊन गेला आणि रायगडा जिल्ह्यातील निर्जन भागात फेकून दिला. या प्रकरणाचा तपास करत पोलिसांनी तातडीने कारवाई करत मुख्य आरोपीला अटक केली आहे.

लग्न करण्यासाठी सातत्याने दबाव टाकल्याने महिलेचा मर्डर

या घटनेची सुरुवात कंचारपालम येथील दुर्गा नगर परिसरातून झाली. बोलिसेट्टी सुरेश हा व्यवसायाने कारचालक असून त्याची पत्नी गर्भवती होती. पत्नीची देखभाल आणि घरातील कामांसाठी त्याने परिचयातील एका तरुणीला घरी बोलावले होते. एकाच घरात राहत असताना सुरेश आणि त्या तरुणीमध्ये जवळीक निर्माण झाली आणि त्यांच्यात अनैतिक संबंध प्रस्थापित झाले. काही काळानंतर आरोपीची गर्भवती पत्नी माहेरी गेली. त्याच दरम्यान संबंधित तरुणीने सुरेशवर लग्न करण्यासाठी सातत्याने दबाव टाकण्यास सुरुवात केली. याच कारणावरून दोघांमध्ये तीव्र वाद झाला. वादाच्या भरात सुरेशने तरुणीला जोरात भिंतीवर आपटले, तिच्यावर मारहाण केली आणि तिची हत्या केल्याचा आरोप आहे.

मृतदेह सुटकेसमध्ये कोंबून केला प्रवास

हत्या केल्यानंतर आरोपीने पुरावे नष्ट करण्यासाठी थरकाप उडवणारा कट रचला. त्याने मृतदेह एका मोठ्या सुटकेसमध्ये कोंबून बंद केला आणि कोणालाही संशय येऊ नये म्हणून रेल्वेने ओडिशातील रायगडा जिल्ह्यात प्रवास केला. तेथे चंदिली पोलीस ठाण्याच्या हद्दीतील एका निर्जन भागात सुटकेस फेकून तो पुन्हा विशाखापट्टणमला परतला. मृतदेह अशा पद्धतीने टाकल्यामुळे गुन्ह्याचा माग काढणे कठीण जाईल, अशी आरोपीची योजना होती.

मात्र स्थानिक नागरिकांच्या सतर्कतेमुळे या हत्येचा उलगडा झाला. निर्जन भागात पडलेली संशयास्पद बेवारस सुटकेस पाहून नागरिकांनी तत्काळ ओडिशा पोलिसांना माहिती दिली. पोलिसांनी घटनास्थळी पोहोचून सुटकेस उघडली असता त्यामध्ये महिलेचा मृतदेह आढळून आला. त्यानंतर मृतदेह शवविच्छेदनासाठी पाठवण्यात आला आणि तपास सुरू करण्यात आला. तपासादरम्यान मिळालेल्या पुराव्यांच्या आधारे या हत्येचे धागेदोरे विशाखापट्टणमपर्यंत पोहोचले. त्यानंतर ओडिशा पोलिसांचे पथक तातडीने कंचारपालम येथे दाखल झाले आणि मुख्य आरोपी बोलिसेट्टी सुरेश याला अटक केली.