विद्यार्थिनिशी अश्लील वर्तन करणाऱ्या शिक्षकाला बेड्या 

            एका नामांकित शाळेत शिक्षण घेत असलेल्या अल्पवयीन विद्यार्थिनी सोबत अश्लील वर्तन करणाऱ्या शिक्षकाला विद्यार्थिनी आणि त्यांच्या पालकांच्या तक्रारीवरून बेड्या ठेवण्यात आल्या आहेत. याप्रकरणी  पोक्सो कायद्यान्वये गुन्हा दाखल झाला असून शिक्षकाला अटक करण्यात आली आहे. गोवर्धन गोंडाणे असे आरोपी शिक्षकाचे नाव आहे.

काय आहे प्रकरण?

शाळेतील शिक्षक वर्गातील विद्यार्थिनींशी गैरवर्तन करत असल्याची माहिती शहर पोलिसांना मिळालेली होती. पोलिस अधीक्षक मुम्मका सुदर्शन यांनी प्रकरणाचे गांभीर्य ओळखत तातडीने शाहनिशा करण्याचे आदेश दिले. त्यानुसार एका महिला पोलिस कर्मचाऱ्याने साध्या वेशात शाळेत जाऊन चौकशी केली.

प्राथमिक तपासात तथ्य आढळताच महिला व बालविकास विभागाने विद्यार्थिनींशी संवाद साधला. यावेळी सहा मुलींनी या शिक्षकाच्या कृत्यांचा पाढाच वाचला. त्यावरून त्याला अटक केली.

पीडित मुलींनी काय सांगितलं?

आरोपी गोवर्धन गोंडाणे हा मागील अनेक वर्षांपासून याच शाळेत कार्यरत होता. तो वर्गात शिकवताना मुलींकडे अत्यंत वाईट नजरेने बघायचा. शाबासकी देण्याच्या नावावर शरीराला अश्लील स्पर्श करणे, मांडीला हात लावणे आणि संगणक लॅबमध्ये एकट्या विद्यार्थिनीला बोलावून अश्लील चाळे करणे, असे कृत्य करत होता असे पीडित मुलींनी तक्रारीत म्हटले आहे.

सदर शिक्षक अनेक वर्षांपासून याच शाळेत असल्याने, त्याने यापूर्वीही अशाच प्रकारे इतर विद्यार्थिनींची छेड काढली असण्याची भीती व्यक्त केली जात आहे. आरोपी शिक्षक गोवर्धन गोंडाणे याला शनिवारी न्यायालयात हजर केले असता, त्याची १५ दिवसांच्या न्यायालयीन कोठडीत रवानगी करण्यात आली आहे.