चुकीची अफवा आणि दोघांचा गेला जीव 

रजनी नगर परिषदेत लिपिक होत्या. तर मिथुन पाणी पुरवठा विभागात कार्यरत होता. रजनी यांच्या पतीचं निधन झालं होतं. त्या मिथुनला मुलासारखं मानायच्या. दोघे एकाच कार्यालयात काम करायचे. त्यांचे प्रेमसंबंध असल्याची चर्चा कार्यालयात व्हायची. तशी कुजबुज दबक्या आवाजात सुरु होती. पोलिसांना रजनी यांच्या घरात एक सुसाईड नोट सापडली आहे. त्यामुळे या प्रकरणानं गंभीर वळण घेतलं आहे.

रजनी यांनी अखेरच्या चिठ्ठीत मनातलं शल्य लिहून ठेवलं आहे. ‘ज्याला मी मुलासारखं मानायचे, त्याच्याच सोबत माझं अफेअर असल्याचे टोमणे ऐकले. हा प्रकार सहन करायच्या पलीकडचा होता. ऑफिसातील कर्मचारी माझ्याकडे चुकीच्या नजरेनं पाहायचे. माझ्या चारित्र्यावर प्रश्न उपस्थित केले जात होते,’ अशी खंत रजनी यांच्या चिठ्ठीत लिहिली आहे. या चिठ्ठीत रजनी यांनी ४-५ जणांच्या नावांचा उल्लेख केला आहे, ज्यांनी रजनी यांना टोमणे मारले, त्यांच्या चारित्र्यावर शिंतोडे उठवले.

सुसाईड नोटच्या आधारावर बैतूल पोलिसांनी तपास सुरु केला आहे. कार्यालयातील वातावरण आणि दोघांच्या नात्यांबद्दलचा गैरसमज यामुळे दोघेही मानसिक तणावाखाली होते. मंगळवारी संध्याकाळी दोघे घरातून निघाले. रजनी यांनी त्यांचा फोन घरातच ठेवला. तर मिथुन मोबाईल घेऊन निघाला. त्यांचं लोकेशन शोधत पोलीस बयावाडी गावात पोहोचले. तिथे एका शेताजवळ रजनी आणि मिथुन यांच्या चपला सापडल्या. मिथुनचा मोबाईल आणि बाईकदेखील तिथेच होती. पोलिसांनी एसडीआरएफच्या पथकाला पाचारण केलं. बुधवारी सकाळी दोघांचे मृतदेह विहिरीतून काढण्यात आले.