- पहलगाम / प्रतिनिधी
पहलगाम अतिरेकी हल्यात २६ निष्पाप लोकांचा दहशतवाद्यांनी बळी घेतला होता. या हल्ल्याची जबाबदारी पाकिस्तानी दहशतवादी संघटना टीआरएफ ने स्वीकारली होती. दहशतवाद्यांना कंत्राटी पद्धतीवर काम करणाऱ्या शिक्षकाने मदत केल्याचे पोलिस तपासात उघड झाले आहे.
जम्मू आणि काश्मीरमधील पहलगाम दहशतवादी हल्ल्यात दहशतवाद्यांना मदत करणाऱ्या एका व्यक्तीला पोलिसांनी अटक केली आहे. दक्षिण काश्मीरचा रहिवासी मोहम्मद युसूफ कटारिया असे या व्यक्तीचे नाव आहे.
अधिकाऱ्यांनी या घटनेचे वर्णन दक्षिण काश्मीरमधील दहशतवादी नेटवर्कविरुद्ध एक मोठी प्रगती म्हणून केले. कटारियाच्या सहकाऱ्यांची ओळख पटविण्यासाठी आणि लष्कर – ए – तैयबा ( टीआरएफ ) शी जोडलेले नेटवर्क उध्वस्त करण्यासाठी पुढील तपास सुरू आहे . जम्मू – काश्मीरमध्ये शांतता प्रस्थापित करण्यासाठी आणि दहशतवादी मॉड्यूल नष्ट करण्यासाठी कारवाई तीव्र करण्याची वचनबद्धता पोलिसांनी पुन्हा व्यक्त केली.
मोहम्मद युसूफ कटारिया पहलगाममध्ये शिक्षक म्हणून कंत्राटावर काम करत होता. स्थानिक मुलांना शिकवत होता. काही महिन्यांपूर्वी तो दहशतवाद्यांच्या संपर्कात आला आणि त्यांना मदत करू लागला. २२ एप्रिल रोजी पहलगामच्या बैसरन खोऱ्यात दहशतवाद्यांनी २६ पर्यटकांना त्यांच्या धर्मावर प्रश्नचिन्ह उपस्थित करून ठार मारले. पाकिस्तानस्थित दहशतवादी संघटना टीआरएफने या हल्ल्याची जबाबदारी स्वीकारली.
या हल्ल्याचा बदला म्हणून भारताने ऑपरेशन सिंदूर अंतर्गत पाकिस्तानमधील दहशतवादी अड्डे उद्ध्वस्त केले , ज्यामध्ये १०० हून अधिक दहशतवादी ठार झाले. त्यानंतर, २८ जुलै रोजी ऑपरेशन महादेव अंतर्गत, सैन्याने हल्ल्यात सहभागी असलेल्या लष्कर-ए-तोयबाच्या तीन दहशतवाद्यांना ठार मारले.
