अजबच ह…… दारूच्या तस्करीच्या आरोपाखाली चक्क घोड्याला अटक 

                    तस्करी प्रकरणात तस्करी साठी वापरलेली वाहने जप्त करण्यात येते..पण बिहार मधून एक अफलातून प्रकरण समोर आले आहे. येथील पोलिसांनी चक्क एका घोड्याला दारू तस्करीच्या आरोपाखाली अटक केली आहे.  या घोडय़ावर पोलिसांनी देशी दारूची चोरटय़ा मार्गाने तस्करी केल्याचा आरोप ठेवला आहे.

बिहारमध्ये काही तस्कर अमली पदार्थांच्या तस्करीसाठी घोडय़ाचा वापर करत आहेत, परंतु चंपारण पोलिसांनी घोडय़ाच्या मालकाविरोधात कारवाई करण्याऐवजी घोडय़ाला नजरकैदेत ठेवले आहे. गंडक नदीकाठावर एक घोडा रोखण्यात आला. त्याच्यावर लादलेला माल संशयास्पद वाटल्याने त्याची तपासणी केली असता, त्याच्यावर लादलेल्या सामानात मद्याचे फुगे आढळून आले. त्यानंतर पोलिसांनी या घोडय़ास दारूसह ताब्यात घेतले. मात्र घोडय़ाचा मालक असलेला तस्कर अंधाराच्या आडून पळून जाण्यात यशस्वी झाला. हा माल उत्तर प्रदेशातून आणण्यात आला होता, असे पोलिसांनी सांगितले. पोलिसांनी जप्त केलेला घोडा स्थानिक रहिवाशाच्या देखरेखीखाली ठेवण्यात आला आहे. आरोपीला न्यायालयात आणल्यानंतर त्याच्या देखभालीचा खर्च आरोपीकडून वसूल केला जाईल. जर आरोपीने दंड भरला नाही तर घोडय़ाचा लिलाव केला जाऊ शकतो.

तस्करांचा वेगळा मार्ग

देशी आणि विदेशी दारूची तस्करी करण्यासाठी तस्करांनी आता वेगळा मार्ग अवलंबिला आहे. सुरुवातीला नदीकाठच्या पट्टय़ांमधून दारू वाहतूक करण्यासाठी बोटींचा वापर केला जात होता, परंतु नदीतील गस्त वाढल्यामुळे त्यांना नवीन रणनीती अवलंबण्यास भाग पाडले गेले. आता घोडय़ांसारख्या प्राण्यांचा वापर राज्याच्या सीमा ओलांडून गुप्तपणे दारू वाहतूक करण्यासाठी केला जात आहे. या प्रकरणी आरोपीची ओळख पटली असून आकाश यादव याला तस्करीच्या प्रयत्नासाठी जबाबदार धरले आहे. आरोपी फरार असल्याने घोडय़ाला पोलीस स्टेशनमध्ये आणले.