किरकोळ वादातून तरुणांची निर्घृण हत्या 

नागपूर  / विशेष प्रतिनिधी 

                समोर अचानक वाहन आल्याने चालकाने ब्रेक मारला. दरम्यान मागून येणारी बाईक समोरच्या बाईक ला भिडली. त्यावरून उद्भवलेल्या वादात चाकूने हल्ला झाल्याने एका २२ वर्षीय तरुणाचा मृत्यू झाला आहे.

नागेश शाहू ( रा. डिप्टी सिग्नल) असे मृताचे नाव आहे. पोलिसांनी दिलेल्या माहितीनुसार, नागेश मित्रांसह मोटारसायकलने जात असताना त्याने समोर वाहन आल्याने ब्रेक मारला.

त्यामुळे मागून अल्पवयीन मुलाने दुचाकी धडकवली. या प्रकाराने दोघांमध्ये वाद होऊन हाणामारीही झाली. यात अल्पवयीन मुलाने चाकू काढून नागेश शाहू याच्यावर वार केले. याशिवाय त्याच्या साथीदाराला जखमी केले.

घटनेची माहिती पोलिसांना मिळताच त्यांनी ताफ्यासह घटनास्थळी दाखल होऊन जखमींना मेयोत दाखल केले. पंचनामा करीत मृतदेह उत्तरीय तपासणीसाठी पाठविला. गुन्हा दाखल करून पोलिसांनी अल्पवयीन आरोपीस अटक केली.