एक्स प्रेयसीला भेटायला गेला आणि जीव गमावला 

                  आपल्या मैत्रिणीला घेऊन एक्स प्रेयसीच्या घरी जाणे तरुणाच्या चांगलेच अंगलट आले आहे. एक्स मैत्रीण आणि तिच्या पती कडून झालेल्या अमानवीय मारहाणीत तरुणाचा मृत्यू झाला आहे. तर तरुणी गंभीर जखमी झाली आहे. तिच्यावर दिल्ली येथील रुग्णालयात उपचार सुरू आहेत.

तरुण आपल्या मैत्रीणीसह चौडा गावात गेला होता. आपल्या जुन्या चुकांची माफी मागून संबंध सुधारण्याच्या उद्देशाने तो तिथे गेला होता, मात्र तिथे त्याच्यासोबत जे घडले ते पाहून संपूर्ण परिसर सुन्न झाला आहे. या वादाचे रूपांतर भीषण हिंसेत झाले आणि त्या तरुणाला आपला जीव गमवावा लागला, तर त्याची सोबत असलेली मैत्रीण सध्या रुग्णालयात मृत्यूशी झुंज देत आहे.

हॉकीने बेदम मारहाण करून तिसऱ्या मजल्यावरून ढकलले

मिळालेल्या माहितीनुसार, जेव्हा हा तरुण आपल्या मैत्रिणीसह जुन्या प्रेयसीच्या घरी पोहोचला, तेव्हा तिच्या पतीला प्रचंड राग आला. आरोपी हितेश राणा आणि त्याची पत्नी चंचल यांनी या दोघांनाही पकडून घरामध्ये कोंडले आणि हॉकी स्टिकने त्यांना बेदम मारहाण करण्यास सुरुवात केली. मारहाण इतकी अमानवीय होती की या दोघांनाही गंभीर दुखापत झाली. रात्री 3 वाजेच्या सुमारास हा हिंसाचार इतका टोकाला पोहोचला की, मारहाण करत असतानाच या दोघांनाही घराच्या तिसऱ्या मजल्यावरून खाली फेकण्यात आले. या भीषण घटनेत तरुणाचा जागीच मृत्यू झाला, तर त्याची मैत्रीण गंभीर जखमी झाली असून तिच्यावर दिल्लीतील एका रुग्णालयात उपचार सुरू आहेत.

होणाऱ्या नवऱ्यासमोर तरुणीवर सामूहिक बलात्कार, पोलिसांनी रगेल आरोपीच्या थेट पायावरच झाडल्या गोळ्या!

पोलीस कारवाई आणि आरोपी पती-पत्नीला बेड्या; रागाच्या भरात घेतला बदला

या घटनेची माहिती मिळताच नोएडा पोलिसांनी वेगाने तपास चक्रे फिरवली आणि मुख्य आरोपी हितेश राणा व त्याची पत्नी चंचल यांना अटक केली आहे. पोलिसांनी केलेल्या प्राथमिक चौकशीत अनेक धक्कादायक बाबी समोर आल्या आहेत. आरोपींनी पोलिसांना सांगितले की, मृत तरुण हा चंचलच्या संपर्कात होता आणि ही गोष्ट पती हितेशला अजिबात मान्य नव्हती. तो तरुण आपल्या मैत्रिणीला घेऊन घरी आल्यावर हितेशचा रागाचा पारा चढला आणि त्याने सूड घेण्याच्या भावनेतून ही अमानवीय कृती केली. पोलिसांनी घटनास्थळावरून काही पुरावे जप्त केले असून या प्रकरणाचा सखोल तपास सुरू केला आहे.

प्रशासनाकडून कडक तपासाचे आदेश; अनैतिक संबंध आणि रागातून घडले हत्याकांड

नोएडा पोलिसांनी या प्रकरणातील दोन्ही आरोपींना न्यायालयीन कोठडीत पाठवले आहे. पोलिसांनी दिलेल्या माहितीनुसार, आरोपींनी आपला गुन्हा कबूल केला असून त्यांनी रागाच्या भरात हॉकीने मारहाण केल्याचे मान्य केले आहे. ही घटना अनैतिक संबंध आणि वैयक्तिक रागातून घडल्याचे प्राथमिक तपासात निष्पन्न झाले आहे. तिसऱ्या मजल्यावरून पडल्यामुळे झालेल्या मृत्यूला अपघाताचे रूप देण्याचा प्रयत्नही आरोपींकडून करण्यात आला होता, मात्र पोलिसांनी तांत्रिक पुराव्यांच्या आधारे त्यांचे पितळ उघडे पाडले. सध्या जखमी तरुणीची प्रकृती चिंताजनक असून पोलीस तिची साक्ष नोंदवण्याची वाट पाहत आहेत, जेणेकरून या प्रकरणातील अधिक दुवे स्पष्ट होतील.