यावेळी निळ्या ड्रम मध्ये मृतदेह नाही तर सापडले भलतेच काही 

प्रयागराज / विशेष प्रतिनिधी 

               निळा ड्रम म्हटला की आठवण होते ती 3 मार्च 2025 रोजी घडलेल्या सौरभ याच्या हत्याकांडाची.पत्नी मुस्कान आणि प्रियकर साहिल शुक्ला यांची सौरभ याची हत्या करून त्याचा मृतदेहाचे तुकडे करून त्या ड्रम ला सिमेंट ने सील केले होते. सध्या प्रयागराज मध्ये जमिनीखाली तीन ड्रम सापडले आहेत.यात मृतदेह नाही तर कोट्यवधीची रोकड सापडली आहे. 

गंगानगर विभागातील नवाबगंज पोलीस ठाण्याच्या हद्दीतील बरईपूर रामनगर गावात २८ ऑक्टोबर रोजी जमिनीखाली पुरलेले निळ्या रंगाचे तीन ड्रम आढळले होते. या ड्रममध्ये मोठ्या प्रमाणात रोख रक्कम भरून ठेवण्यात आली होती. आयकर विभागाच्या पथकाने या रकमेची मोजणी पूर्ण केली असून, त्यामध्ये एकूण ३ कोटी २० लाख ९३ हजार रुपये आढळले आहेत. विशेष म्हणजे, रोकड मोजणी पूर्ण झाली असली तरी आयकर विभागाची कारवाई अद्याप थांबलेली नाही. ज्या घरात हे ड्रम पुरण्यात आले होते, त्या घरातील खोल्या आणि अंगणातही मजुरांच्या मदतीने खोदकाम सुरू आहे. आणखी रोकड लपवून ठेवल्याची शक्यता असल्याने संपूर्ण परिसराची तपासणी केली जात आहे. कारवाईवर लक्ष ठेवण्यासाठी घराच्या आतील आणि बाहेरील भागात सीसीटीव्ही कॅमेरेही बसवण्यात आले आहेत.

या प्रकरणाच्या तपासासाठी आयकर विभागाचे अधिकारी घटनास्थळी तळ ठोकून आहेत. घरात राहणाऱ्या राजेश आणि राकेश यादव यांची चौकशी केली जात आहे. एवढी मोठी रक्कम नेमकी कुठून आली आणि ती जमिनीखाली ड्रममध्ये लपवून ठेवण्यामागे काय कारण होते, याचा शोध अधिकारी घेत आहेत. खोदकाम आणि चौकशीदरम्यान आणखी महत्त्वाची माहिती समोर येण्याची शक्यता व्यक्त केली जात आहे. दरम्यान, मध्य प्रदेशातील मंदसौर जिल्ह्यातही खोदकामादरम्यान ऐतिहासिक चांदीची नाणी सापडल्याचे प्रकरण चर्चेत आले आहे. भानपुरा पोलीस ठाण्याच्या हद्दीतील बरखेडी गावात घराच्या बांधकामासाठी पाया खोदला जात असताना १०० वर्षांहून अधिक जुनी ७०० पेक्षा जास्त चांदीची नाणी आढळली होती. ही नाणी ब्रिटिश राजवटीच्या काळातील असून, त्यांवर १९०४ च्या आसपासच्या खुणा असल्याचे सांगण्यात आले आहे. नाणी सापडल्यानंतर घरमालक, मजूर आणि अन्य काही लोकांनी त्यांची आपापसांत वाटणी केली आणि हा प्रकार दडपण्याचा प्रयत्न केला. मात्र, नाण्यांच्या संख्येवरून वाद निर्माण झाल्यानंतर हे प्रकरण पोलिसांपर्यंत पोहोचले.