गावातील लाईट बंद आणि बिबट्याने डाव साधला,

 26 महिन्याच्या बाळाला नेले उचलून

सातारा /विशेष प्रतिनिधी

                          नाळेवाडी गावात घडलेल्या घटनेने गावात हळहळ व्यक्त होत आहे. गावातील लाईट बंद होती. आणि जय संदीप खंडागळे हा अंगणात खेळत होता. संधी साधून  26 महिन्याच्या बाळाला बिबट्याने उचलून उसाच्या शेतात नेले. गावकऱ्यांनी आरडाओरडा केला. बिबट्या तान्हुल्याला सोडून पळून गेला.पण जय मात्र देवाघरी गेला. या घटनेने खंडागळे कुटुंब दहशतीत आहे. वन विभागावर गावकरी नाराज आहेत. 

मिळालेल्या माहितीनुसार, नाळेवाडी परिसरात गेल्या 3 महिन्यांपासून बिबट्याचा वावर होता. संध्याकाळी वीजपुरवठा खंडित झालेला असताना लहानगा जय घराबाहेर खेळत होता. अंधाराचा फायदा घेऊन बिबट्याने अचानक त्याच्यावर हल्ला केला आणि त्याला उचलून उसाच्या शेताच्या दिशेने 500 मीटर ओढत नेले. ग्रामस्थांनी आरडाओरडा करत बिबट्याचा पाठलाग केला. लोकांच्या गोंधळामुळे बिबट्याने बालकाला सोडले अन् पळ काढला, मात्र गंभीर जखमी झाल्यामुळे डॉक्टरांनी जयला रुग्णालयात मृत घोषित केले.

नाळेवाडी, शिवथर, मालगाव आणि कोलवडी परिसरातील नागरिकांनी बिबट्याबाबत वनविभागाकडे आधीच तक्रारी केल्या होत्या. मात्र प्रशासनाच्या दुर्लक्षामुळेच हा निष्पाप बालकाचा जीव गेल्याचा आरोप करत ग्रामस्थांनी तीव्र संताप व्यक्त केला आहे. घटनेची माहिती मिळताच सातारा तालुका पोलीस आणि वनविभागाचे पथक घटनास्थळी दाखल झाले. पोलीस निरीक्षक निलेश तांबे यांनी दिलेल्या माहितीनुसार, वनविभागाने बिबट्याला लवकरात लवकर पिंजरा लावून जेरबंद करण्याचे आश्वासन दिले आहे. याशिवाय पोलीस आणि वरिष्ठ अधिकारी या प्रकरणाची चौकशी करत आहेत.