शेजारी महिले सोबतच्या कथित अनैतिक संबंधाच्या शंकेत तरुणाचा खून 

नदीकाठी कुजलेल्या स्थितीत आढळला  पोत्यात मृतदेह 

आसाम / विशेष प्रतिनिधी 

                      शेजाऱ्याच्या पत्नीसोबत कथित अनैतिक संबंधाच्या शंकेत 31 वर्षीय तरुणाचा खून करण्यात आल्याची घटना आसाम मधील जोरहाट जिल्ह्यातून उघडकीस आली आहे. अनिल राजगढ असे या मृत तरुणाचे नाव आहे.पोलिसांनी या प्रकरणात महिलेसह चार आरोपींना अटक केली आहे. 

शेजाऱ्याच्या पत्नीसोबत असलेल्या कथित संबंधांवरून वाद

अधिकची माहिती अशी की, मृत अनिल 7 सप्टेंबर रोजी बेपत्ता झाला होता. त्यानंतर त्याच्या कुटुंबीयांनी मरियानी पोलीस ठाण्यात तक्रार दाखल केली. पोलिसांनी तपास सुरू केल्यानंतर 11 सप्टेंबर रोजी भोगदोई नदीजवळ नदीकाठच्या परिसरातून अनिलचा सडलेला मृतदेह सापडला. अनिल जोरहाटच्या मरियानी परिसरातील ग्रीनव्ह्यू टी इस्टेटमध्ये राहत होता. पोलिसांच्या माहितीनुसार, शेजाऱ्याच्या पत्नीसोबत असलेल्या कथित संबंधांवरून हा वाद निर्माण झाला होता.

अनिमाने अनिलला चहाच्या मळ्याच्या परिसरात बोलावल्याचा आरोप

या प्रकरणात पोलिसांनी कपिल कर्मकार, त्याची पत्नी अनिमा कर्मकार, कपिलचा धाकटा भाऊ संजीत कर्मकार आणि त्यांचा मित्र महेश राजगढ़ यांना अटक केली आहे. पोलिसांच्या म्हणण्यानुसार, अनिल गेल्या काही महिन्यांपासून अनिमाच्या संपर्कात होता. 7 सप्टेंबर रोजी अनिमाने अनिलला चहाच्या मळ्याच्या परिसरात बोलावल्याचा आरोप आहे. तेथे कपिल आणि अन्य आरोपी आधीच उपस्थित होते. पोलिसांच्या माहितीनुसार, अनिमाने कथितपणे धारदार ब्लेडने अनिलवर हल्ला केला. त्यानंतर कपिल, संजीत आणि महेशही हल्ल्यात सहभागी झाल्याचा आरोप आहे. पोलिसांच्या म्हणण्यानुसार, धारदार शस्त्राने अनिलचे शिर धडापासून वेगळे करण्यात आले.