तरोडा शेतशिवारात मिळालेल्या अज्ञात व्यक्तीचे मारेकरी स्थानिक गुन्हे शाखेकडून जेरबंद

प्रतिनिधी मुबीन शेख. शिरजगाव कसबा

 अमरावती जिल्ह्यात येणारे पोलीस स्टेशन कुऱ्हा येथील दिनांक २०/०५/२०२३ रोजी फिर्यादी पोलीस पाटील सौ. माधुरी जगताप रा. तरोडा यांनी पोलीस स्टेशन कुऱ्हा  येथे प्रभाकर जगताप यांचे शेतात कोणत्या तरी अज्ञात व्यक्तीचा  मृतदेह पडलेला आहे. आणि त्याचे पोटावर, कमरेच्यावर, पायावर अज्ञात आरोपीतांनी धारदार शस्त्राने वार करून जिवानिशी ठार केले आहे. अशा फिर्यादीचे तक्रारीवरुन पोलीस स्टेशन कुऱ्हा येथे अपराध क्रमांक १६१ / २३ कलम ३०२ भादंवी चा गुन्हा नोंद करण्यात आला होता.

घटनेचे गांभीर्य पाहता मा.  अविनाश बारगळ, पोलीस अधीक्षक, अमरावती ग्रामीण यांनी घटनास्थळाला भेट देवून गुन्हयात मृतक याची ओळख पटवून आरोपी निष्पन्न करणे व आरोपीस अटक करून गुन्हा उघडकीस आणणेबाबत तपास अधिकारी यांना मार्गदर्शन करून आदेशीत केले होते.

त्या अनुषंगाने पोलीस निरीक्षक गुन्हे शाखा अमरावती ग्रामीण. तपन कोल्हे यांचे मार्गदर्शनात स्थानिक गुन्हे शाखेतील  पोलीस उप निरीक्षक मुलचंद भांबुरकर यांचे स्वतंत्र पथक स्थापन करण्यात आले होते. दिनांक २०/०५/२०२३ रोजी पथकातील अधिकारी व अंमलदार हे अज्ञात मृतक याची ओळख पटविण्याकरीता परिसरातील सर्व गोपनिय बातमीदार, पोलीस पाटील व सरपंच यांचे मोबाईल व वॉट्सपग्रुपवर मृतकचे फोटो वायरल करण्यात आले होते.दरम्यान पथकातील अंमलदार यांना गोपनिय बातमीदाराकडून खबर मिळाली की, सदर मृतकचे नाव सतीश गंगाधर कुरटकार वय ३८ वर्ष, रा. खडक सावंगा जि. यवतमाळ ह.मु. जळगाव आर्वी येथील असुन तो जळगाव आर्वी येथील जावाई आहे. अशा माहितीवरुन त्याचे कुटूंबातील त्याची पत्नी व परिवारास भेटून माहिती घेवून गावातील गोपनिय बातमीदारामार्फत माहिती मिळाली की, मृतक याने १९/०५/२०२३ रोजी सकाळी ११ वा. दरम्यान घरगुती वादावरुन पत्नी व मुलांना दारु पिवून मारहाण केली. तसेच मृतक हा नेहमीच कुटूंबाला दारु पिवून मारहाण करीत असल्याने मृतकचा मुलगा अभी  कुरटकार हा त्रस्त  झाला होता. तसेच  यश कुरटकार याचे आईचे सुध्दा अंगावर गेला होता. त्यामुळे नेहमीचा त्रास असहय झाल्याने  अभी सतीश कुरटकार वय १९ वर्ष, रा. जळगाव आर्वी ता. धामणगाव रेल्वे व यश जगदीश कुरटकार वय १९ वर्ष, रा. खडक सावंगा जि. यवतमाळ यांनी मृतक यास काहीतरी कारण सांगुन कॅनलचे  रस्त्याने एका शेतात नेवून कोणत्यातरी शस्त्राने मारुन जिवानीशी ठार मारले. पुढील तपास सहाय्यक पोलीस निरीक्षक  गिता तांगडे ठाणेदार, पोलीस स्टेशन कुऱ्हा हे करीत आहे.

सदरची कामगिरी मा. पोलीस अधीक्षक  अविनाश बारगळ. मा. अपर पोलीस अधिक्षक  शशिकांत सातव. उपविभागीय पोलीस अधिकारी सुर्यकांत जगदाळे, पोलीस निरीक्षक स्थानिक गुन्हे शाखा, तपन कोल्हे यांचे मार्गदर्शनात  पोलीस उप निरीक्षक  मुलचंद भांबुरकर, पोलीस हेड कॉन्स्टेबल  पुरुषोत्तम यादव,  मंगेश लकडे, सचिन मसांगे, चालक मंगेश यांनी केली.