मोर्शी / प्रतिनिधी
मोर्शी) नगर परिषद कार्यालयात गुरुवार, दिनांक १६ जानेवारी रोजी सकाळी आयोजित करण्यात आलेल्या आढावा बैठकीत शहरातील नागरिकांनी त्यांच्या समस्या मांडल्या. या बैठकीत प्रधानमंत्री आवास योजना, स्वच्छता अभियान, पाणीटंचाई, अण्णाभाऊ साठे योजना, घरकुल योजनेसह अन्य अनेक समस्या नागरिकांनी उघड केल्या. नगर परिषद अंतर्गत येणाऱ्या प्रश्नांवर तातडीने उपाययोजना करण्यासाठी मुख्य अधिकाऱ्यांना आवश्यक निर्देश देण्यात आले.
बैठकीत “आमदार उमेश यावलकर” यांची विशेष उपस्थिती होती. त्यांनी नागरिकांच्या समस्या गांभीर्याने ऐकून घेतल्या आणि त्या सोडवण्यासाठी प्रशासनासोबत समन्वय साधून तातडीने पावले उचलण्याचे आश्वासन दिले. बैठकीत नागरिकांनी घरकुल योजनेच्या अंमलबजावणीबाबत चिंता व्यक्त केली. वंचित समाजातील अनेक नागरिकांना अद्याप घरकुल मिळालेले नाही. अण्णाभाऊ साठे योजनेच्या लाभार्थ्यांपर्यंत योजना पोहोचत नसल्याची तक्रार देखील करण्यात आली. याशिवाय, शहरात पाणीटंचाईचा प्रश्न दिवसेंदिवस गंभीर होत चालला आहे. पाणीपुरवठा सुरळीत होण्यासाठी ठोस उपाययोजना करण्याची मागणी यावेळी नागरिकांनी केली. जड वाहतुकीच्या समस्येवर उपाययोजना गरजेची.
मोर्शी शहरातील जड वाहतुकीमुळे होणारी वाहतूक कोंडी आणि त्यामुळे होणाऱ्या दुर्घटनांबाबतही चिंता व्यक्त करण्यात आली. जड वाहतुकीला पर्यायी मार्ग उपलब्ध करून देण्याचे आणि शहरातून जड वाहतूक बंद करण्याचे आदेश यावेळी देण्यात आले.
“आमदार उमेश यावलकर” यांनी जड वाहतुकीच्या मार्गासाठी पर्यायी उपाय शोधून यंत्रणांना लवकर अंमलबजावणीचे निर्देश दिले. डीपी रोड समस्येबाबत चर्चा
डीपी रोडच्या अपूर्ण कामांबाबत नागरिकांनी प्रशासनावर नाराजी व्यक्त केली. अनेक रस्त्यांची कामे रखडली असून त्यामुळे होणाऱ्या त्रासाबाबतही तक्रारी करण्यात आल्या. अपूर्ण रस्त्यांची कामे तातडीने पूर्ण करण्याचे निर्देश यावेळी संबंधित अधिकाऱ्यांना देण्यात आले. स्वच्छता अभियानावर भर
शहर स्वच्छता अभियान प्रभावीपणे राबवण्यासाठी अतिरिक्त मनुष्यबळ आणि संसाधनांची मागणी यावेळी करण्यात आली. कचरा व्यवस्थापनाबाबत नागरिकांनी असमाधान व्यक्त केले. यावर मुख्य अधिकाऱ्यांनी तातडीने उपाययोजना करण्याचे आश्वासन दिले. शहरातील तहसील कार्यालयाच्या उद्घाटनाबाबत चर्चा झाली. तसेच, नगर परिषद उपाययोजनांसाठी आवश्यक निधी उपलब्ध करून देण्यासाठी पाठपुरावा करण्याची मागणी यावेळी करण्यात आली. नागरिकांनी सरकारी योजनांचा अधिकाधिक लाभ मिळवून देण्यासाठी प्रशासनाला सहकार्य करण्याचे आवाहन केले. या बैठकीस भारतीय जनता पक्षाचे स्थानिक पदाधिकारी आणि कार्यकर्ते उपस्थित होते. त्यांनी नागरिकांच्या समस्या ऐकून घेतल्या आणि त्या सोडवण्यासाठी तत्काळ पावले उचलण्याचे आश्वासन दिले. “आमदार उमेश यावलकर” यांनी शहराच्या सर्वांगीण विकासासाठी प्रशासनासोबत हातमिळवणी करून कार्यरत राहण्याचा निर्धार व्यक्त केला. मोर्शी नगर परिषदेच्या या आढावा बैठकीत नागरिकांच्या समस्या ऐकून त्या सोडवण्यासाठी प्रशासनाने तातडीने पावले उचलण्याचे आदेश दिले. आमदार उमेश यावलकर यांच्या नेतृत्वाखाली प्रधानमंत्री आवास योजना, स्वच्छता अभियान, घरकुल योजना, डीपी रोडसारख्या महत्त्वाच्या विषयांवर चर्चा झाली. या बैठकीतून नागरिकांना त्यांच्या समस्या सोडवण्यासाठी लवकरच सकारात्मक तोडगा मिळनार अशे आश्वासन आमदार उमेश यावलकर यांनी दिले.
