तो 23 वर्षापासून मनात पाळुन होता खुन्नस , वडिलांच्या खुनाचा घेतला बदला

पुणे / विशेष प्रतिनिधी

                   मनात कुठल्याही गोष्टीची खुन्नस पाळुन ठेवली की त्याचे पर्यावसान भयंकर घटनेत होते. अशीच एक घटना पुणे जिल्ह्यात ही घटना घडली आहे.वडिलांच्या खुनाचा बदला घेण्यासाठी तो 23वर्ष वाट पाहत होता. आणि जसाच चान्स मिळाला त्याने आपल्या तीन मित्रांसह वडिलांच्या खुनाचा बदला घेतला.

पुणे-सातारा महामार्गावरील जुन्या कात्रज बोगद्याजवळील शिंदेवाडी परिसरात ही घटना घडली होती. या प्रकरणी पुणे ग्रामीण पोलिसांच्या स्थानिक गुन्हे अन्वेषण शाखा (LCB) आणि राजगड पोलिसांनी धडक कारवाई करत चार आरोपींना गजाआड केले आहे.

संजय बाबूराव कडू-देशमुख (वय-40, रा.मुंढवा,मूळ रा.कुरण,ता.वेल्हे) असे खून झालेल्या व्यक्तीचे नाव आहे. तर मंथन दिनेश वैद्य (मुख्य सूत्रधार), सौरभ सागर परदेशी, मिझान गौसउद्दीन शेख आणि संदीप बाबुलाल कोरी अशी आरोपींची नावं आहेत.

नेमकी घटना काय?

गेल्या 11 जुलै रोजी पुणे-सातारा महामार्गावरील जुन्या कात्रज बोगद्याजवळील शिंदेवाडी परिसरात संजय देशमुख यांच्यावर अज्ञात हल्खोरांनी धारदार शस्त्राने वार करून त्यांची अत्यंत निर्घृणपणे हत्या केली होती. या घटनेमुळे संपूर्ण परिसरात मोठी खळबळ उडाली होती. घटनेचे गांभीर्य ओळखून राजगड पोलिस स्टेशनमध्ये खुनाचा गुन्हा दाखल करण्यात आला आहे. पोलिसांनी तातडीने तपासाची चक्रे फिरवली आणि आरोपींना गजाआड केले आहे.

पोलिसांची कारवाई आणि गुन्ह्याचा उलगडा

स्थानिक गुन्हे अन्वेषण शाखा (LCB) आणि राजगड पोलिसांनी या हत्येचा संयुक्तपणे तपास सुरू केला. तपासादरम्यान मिळालेल्या गोपनिय माहितीच्या आधारे पोलिसांनी संशयित मंथन वैद्य आणि सौरभ परदेशी यांना ताब्यात घेतले. त्यांची कसून चौकशी केली असता, त्यांनी मिझान शेख आणि संदीप कोरी यांच्या मदतीने संजय देशमुख यांची हत्या केल्याची उघड कबुली दिली. पोलिसांनी तातडीने उर्वरित दोन साथीदारांनाही अटक केली. आरोपींच्या ताब्यातून देशी बनावटीचे एक पिस्तूल आणि 3 जिवंत काडतुसे जप्त करण्यात आली आहेत.

23 वर्षांपूर्वीचा तो वाद अन् सूडाचा बदला

पोलिसांनी दिलेल्या माहितीनुसार, मुख्य आरोपी मंथन वैद्य याचे वडील दिनेश वैद्य यांचा खून 23 वर्षांपूर्वी संजय देशमुख यांनी केला होता. आपल्या वडिलांच्या हत्येचा राग मंथनच्या मनात गेली 23 वर्षे धगधगत होता. वडिलांच्या खुनाचा बदला घेण्यासाठी तो योग्य वेळेची वाट पाहत होता. अखेर त्याने आपल्या साथीदारांच्या मदतीने संजय देशमुख यांच्यावर पाळत ठेवून त्यांची धारदार शस्त्राने हत्या करून 23 वर्षांनंतर बदला पूर्ण केला. सध्या चारही आरोपींना कोर्टात हजर करण्यात आले असून राजगड पोलिस या प्रकरणाचा पुढील तपास करत आहेत.