नाशिक जिल्ह्यात ‘ ऑनर किलिंग ‘ भेटीसाठी बोलावून तरुणाला संपवले 

कुटुंबाच्या प्रतिष्ठेखातर घडलेल्या या ‘ऑनर किलिंग’ प्रकरणात त्र्यंबकेश्वर पोलिसांनी तत्परता दाखवत तरुणीच्या भावाला अटक केली आहे. सापगाव ते ब्रह्मगिरी फेरी मार्ग रस्त्यावरील स्मशानभूमीजवळ ही रक्तरंजित घटना घडली.

आर्यन सोमनाथ कांबळे (वय १८) असं हत्या झालेल्या तरुणाचं नाव आहे. तर आदित्य एकनाथ मोंढे (वय २०, रा. शिरसगाव) असे अटक करण्यात आलेल्या आरोपी भावाचे नाव आहे. आरोपी आदित्य याने भेटायला बोलवून आर्यनची हत्या केली.भेटण्यासाठी बोलावून केला घात

पोलिसांनी दिलेल्या माहितीनुसार, मयत आर्यन कांबळे आणि आरोपीची बहीण यांच्यात गेल्या ६ महिन्यांपासून प्रेमसंबंध होते. आरोपी आदित्य मोंढे याने आर्यनला आपल्या बहिणीसोबत असलेल्या संबंधांवरून चर्चा करण्यासाठी सापगाव येथील स्मशानभूमीजवळ बोलावून घेतले.
तिथे त्या दोघांमध्ये जोरदार वाद झाला. या वादादरम्यान राग अनावर झालेल्या आदित्य याने जवळ असलेला धारदार चाकू काढून आर्यनच्या पोटावर, गळ्यावर, हातावर आणि छातीवर सपासप वार केले. या हल्ल्यात रक्ताच्या थारोळ्यात पडलेल्या आर्यनला उपचारासाठी दाखल करण्यात आले, मात्र उपचारादरम्यान त्याचा मृत्यू झाला.एकाच समाजाचे असूनही ऑनर किलिंगचा बळी

विशेष म्हणजे मयत आर्यन आणि आरोपीची बहीण हे दोघेही एकाच समाजाचे होते, तरीही मुलीच्या कुटुंबाला हे नातं अमान्य होतं. प्रेमसंबंधामुळे कुटुंबाच्या सामाजिक प्रतिष्ठेला धक्का पोहोचत असल्याच्या चुकीच्या समजुतीतून आणि रागातून मुलीच्या भावाचे आर्यनसोबत यापूर्वीही अनेकदा वाद झाले होते. अखेर याच रागातून आदित्यने आर्यनचा काटा काढत त्याची निर्घृण हत्या केली.