लाचखोर पोलिस उपनिरीक्षक आणि हवालदार ACB च्या जाळ्यात 

जालना /विशेष प्रतिनिधी 

 मुलाविरुद्ध दाखल असलेल्या अदखलपात्र गुन्ह्यामध्ये कोणतीही कारवाई न करण्यासाठी २५ हजार रुपयांच्या लाचेची मागणी करून, तडजोडीअंती २० हजार रुपये घेताना बदनापूर पोलिस ठाण्यातील

सहाय्यक पोलिस उपनिरीक्षक आणि एका पोलिस अंमलदाराला छत्रपती संभाजीनगर येथील लाचलुचपत प्रतिबंधक विभागाने शुक्रवारी दुपारी साडेतीन वाजता बाजार गेवराई फाटा येथे रंगेहाथ पकडले. एएसआय गोविंद फुलसिंग डोभाळ आणि पोलिस अंमलदार परमेश्वर नामदेव ढगे अशी लाचखोर पोलिसांची नावे असून, एएसआय डोभाळ याला ५५ हजार तर पोलिस अंमलदार ढगे याला ३५ हजार रुपये पगार असल्याचे पोलिसांनी सांगितले.

बदनापूर तालुक्यातील ४२ वर्षीय शेतकरी तक्रारदाराच्या मुलाविरुद्ध बदनापूर ठाण्यात एक अदखलपात्र गुन्हा दाखल झाला होता. या प्रकरणाचा निपटारा करण्यासाठी आणि कोणतीही कारवाई न करण्यासाठी बदनापूर पोलिस ठाण्याचे सहाय्यक पोलिस उपनिरीक्षक गोविंद फुलसिंग डोभाळ आणि पोलिस अंमलदार परमेश्वर नामदेव ढगे यांनी तक्रारदाराकडे २५,००० रुपयांच्या लाचेची मागणी केली. तक्रारदाराची लाच देण्याची इच्छा नसल्याने त्यांनी लगेच छत्रपती संभाजीनगर येथील लाचलुचपत प्रतिबंधक विभागात तक्रार दिली.