तरुणाने भर रस्त्यात तरुणीला केले नग्न

 मुलीला पॉलिथिनने का झाकावे लागले अंग

हैदराबाद / नवप्रहार मीडिया नेटवर्क

                शहराच्या जवाहर नगर पोलीस ठाण्याच्या हद्दीत माणुसकीला काळिमा फासणारा प्रकार घडला आहे.येथे एका तरुणाने रस्त्याने जाणाऱ्या तरुणीची छेड  काढली. मुलीने विरोध केला असता या तरुणाने तिच्या अंगावरील कपडे फाडून टाकल तिला नग्न केले आहे. मुख्य म्हणजे यावेळी तरुणाची आई त्याच्या सोबत होती. तिने या गोष्टीला जराही विरोध केला नाही. तरुणीच्या मदतीला आलेल्या एका महिलेच्या अंगावर हा तरुण धावून गेला. पोलिसांनी तरुण आणि त्याच्या आईवर गुन्हा दाखल करत त्याला अटक केली आहे.

ही विकृत घटना रस्त्यावरील सीसीटीव्ही कॅमेऱ्यात कैद झाली आहे. या घटनेचा व्हिडीओ सोशल मीडियावर व्हायरल झाल्यानंतर स्थानिक नागरिकांमध्ये संताप पसरला आहे. ‘एनडीटीव्ही’ने दिलेल्या वृत्तानुसार, पीडित तरुणी एका कपड्याच्या दुकानात काम करते. रविवारी रात्री आठच्या सुमारास दुकानातील काम संपवून ती रस्त्याने चालत आपल्या घरी चालली होती.

यावेळी दुचाकीवरून आलेल्या आरोपीनं पीडित तरुणीला चुकीच्या पद्धतीने स्पर्श केला. यावर पीडितेनं आक्षेप घेतल्यानंतर विकृत आरोपी आक्रमक झाला आणि त्याने तिचे भररस्त्यावर कपडे फाडून तिला नग्न केलं. दरम्यान, रस्त्यावरून जाणाऱ्या अन्य एका महिलेनं पीडितेची मदत करत आरोपीला रोखण्याचा प्रयत्न केला. पण आरोपी तिच्यावरही धावून गेला.

विशेष म्हणजे ही घटना घडत असताना आरोपीच्या दुचाकीवर त्याची आईही होती. तरीही तिने पीडित तरुणीला वाचवण्याचा प्रयत्न केला नाही. या घटनेची माहिती मिळताच पोलीस तातडीने घटनास्थळी दाखल झाले आणि आरोपीसह त्याच्या आईला ताब्यात घेतलं. पीडित युवतीला मदत मिळेपर्यंत ती रस्त्यावर नग्न अवस्थेत स्वत:चं अंग झाकण्याचा प्रयत्न करत होती. यानंतर काही महिलांनी पीडित तरुणीला निळ्या रंगाच्या प्लॅस्टिकच्या शीटने झाकलं. या घटनेचा पुढील तपास जवाहर नगर पोलीस करत आहेत.