चार वर्षांनंतर जामिनावर बाहेर आलेल्या तरुणावर प्राणघातक हल्ला 

प्रतिनिधी / जळगाव 

                  हत्येच्या गुन्ह्यात मागील चार वर्षांपासून तुरुंगात असलेला तरुण जामिनावर बाहेर येताच दबा धरून बसलेल्या तीन तरुणांनी त्याच्यावर धारदार शस्त्राने वार केल्याने तरुण गंभीर जखमी झाला आहे. प्रतीक निंबाळकर असे जखमी झालेल्या तरुणाचे नाव आहे. हा हल्ला शहराच्या शाहू नगर परिसरात करण्यात आला आहे.

प्रतिक निंबाळकर हा गेल्या 4 वर्षांपासून खुनाच्या गुन्ह्यात कारागृहात होता. न्यायालयाच्या आदेशाने प्रतिक आजच जामिनावर बाहेर पडला होता, त्यावेळी प्रतिकवर दबा धरून बसलेल्या 3 अज्ञातांनी धारदार शस्त्राने प्राणघातक हल्ला केला. या हल्ल्यानंतर प्रतिकला तातडीने जिल्हा शासकीय वैद्यकीय महाविद्यालयाच्या रुग्णालयात दाखल करण्यात आलं. प्रतिक निंबाळकर याची प्रकृती अत्यंत गंभीर आहे.

प्रतिकवर जीवघेणा हल्ला केल्यानंतर हे तीनही हल्लेखोर फरार झाले असून घटनास्थळी पोलीस पोहोचले आणि त्यांनी अधिक तपासाला सुरूवात केली आहे. संध्याकाळच्या सुमारास जळगाव शहरातील शाहू नगर परिसरात घडलेल्या या घटनेमुळे एकच खळबळ माजली आहे.

2020 साली झालेल्या एका हत्येच्या गुन्ह्यात प्रतिक निंबाळकर हा कारागृहात होता, न्यायालयाच्या आदेशानंतर तो जामिनावर बाहेर आला, पण जेलबाहेर आल्यानंतर काही तासांमध्येच त्याच्यावर तिघांनी धारदार शस्त्राने वार केले. हा हल्ला केल्यानंतर हल्लेखोर घटनास्थळावरून फरार झाले. या हल्ल्यामागे 2020 च्या हत्या प्रकरणाचा संबंध आहे का? याचा तपास पोलीस करत आहेत.