लिव्ह इन मध्ये राहणाऱ्या तरुणीने केली पार्टनर ची हत्या
पोलिसांनी दिलेल्या प्राथमिक माहितीनुसार, शनिवारी रात्री उशिरा सार्थक आणि त्याची प्रेयसी संचलिका यांच्यामध्ये कोणत्यातरी कारणावरून तीव्र स्वरूपाची वादावादी झाली. हा वाद इतका विकोपाला गेला की, संतापलेल्या संचलिकाने घरातील धारदार शस्त्राने सार्थकच्या खांद्यावर प्राणघातक वार केला. या हल्ल्यात सार्थक गंभीर जखमी होऊन रक्ताच्या थारोळ्यात कोसळला. घटनेनंतर गंभीर जखमी सार्थकला तातडीने नजीकच्या रुग्णालयात दाखल करण्यात आले, मात्र उपचारापूर्वीच त्याचा मृत्यू झाल्याचे डॉक्टरांनी घोषित केले.शेजाऱ्यांची दिशाभूल करण्यासाठी बनाव
हत्येची ही घटना लपवण्यासाठी आणि पोलिसांची दिशाभूल करण्यासाठी आरोपी तरुणीने मोठा बनाव रचला. मध्यरात्री दीड वाजण्याच्या सुमारास संचलिका रडत-रडत फ्लॅटमधून बाहेर आली आणि माझ्या प्रियकरावर कुणीतरी बाहेरच्या व्यक्तीने हल्ला केला. त्याला तातडीच्या मदतीची गरज आहे, असा कांगावा तिने केला. तिच्या अंगावर आणि मानेवर काही ओरखड्यांच्या खुणाही दिसून आल्या. तिचा टाहो ऐकून आजूबाजूचे शेजारी मदतीसाठी धावले. त्यांनी फ्लॅटमध्ये जाऊन पाहिले असता सार्थक रक्ताच्या थारोळ्यात पडलेला होता.
घटनेची माहिती मिळताच पोलिसांनी घटनास्थळी धाव घेतली. तपासाची चक्रं वेगानं फिरवली. पोलिसांनी तांत्रिक पुरावे आणि शेजाऱ्यांच्या साक्षीच्या आधारे तपास केला असता, बाहेरची कोणतीही व्यक्ती घरात शिरल्याचं निष्पन्न झाले नाही. उलट, दोन दिवसांआधीच्या वादाच्या मुद्यावरून प्रेयसी संचलिका हिनेच हा जीवघेणा हल्ला केल्याचे समोर आलं.
या खून प्रकरणात संचलिकाची आई मौमिता हिची देखील संशयास्पद भूमिका समोर आली असून पोलीस तिचा सहभाग किती होता, याचा सखोल तपास करत आहेत. याप्रकरणी पोलिसांनी प्रेयसी संचलिका आणि तिची आई मौमिता या दोघींनाही अटक केली असून त्यांची कसून चौकशी केली जात आहे. लिव्ह इनमध्ये राहणाऱ्या तरुणाला तरुणीने अशाप्रकारे संपवल्याने परिसरात खळबळ उडाली आहे.
