खासदार सुनील मेंढे यांनी घेतली केंद्रीय मंत्री पियुष गोयल यांची भेट
भंडारा / राजू आगलावे
दोन्ही जिल्ह्यातील धान खरेदीच्या प्रक्रियेत कोणताही गोंधळ होऊ नये आणि शेतकर्यांना धान विक्री करतांना कोणत्याही अडचणी येऊ नये या अनुषगाने अवगत करण्यासाठी आज केंद्रीय मंत्री पियुषजी गोयल यांची भेट घेतली. यावेळी खासदारांनी मांडलेल्या विविध विषयांवर मंत्री महोदयांनी सकारात्मक निर्णय घेण्याचे आश्वासन दिले.
दिल्ली येथे केंद्रीय सार्वजनिक वितरण आणि ग्राहक संरक्षण मंत्री पियुष गोयल यांची भेट घेत मागण्यांचे एक निवेदन त्यांना देण्यात आले. भंडारा गोंदिया जिल्ह्यातील धान खरेदीच्या संदर्भात काही विषयांच्या अनुषंगाने मंत्री महोदयांना खासदारांनी अवगत केले. महाराष्ट्राला या वर्षी रब्बी धान खरेदीचे 49 लाख क्विंटल चे उद्दिष्ट देण्यात आले आहे. प्रत्यक्षात भंडारा आणि गोंदिया जिल्ह्यात झालेली लागवड बघता 63 लाख क्विंटल खरेदी *(भंडारा -गोंदिया जिल्हयात )* होण्याची शक्यता वर्तवली जात आहे. ही बाब लक्षात घेता खरेदीचे उद्दिष्ट वाढवून देण्याची मागणी खासदारांनी केली. धान खरेदीचे उद्दिष्ट वाढवून देण्यासंदर्भात महाराष्ट्र शासनाचे पत्र अद्याप आले नाही. राज्याकडून मागणी येताच, धान खरेदीचे उद्दिष्ट वाढवून देण्यात येईल शेतकऱ्यांनी काळजी करू नये असा विश्वास मंत्री पियुष गोयल यांनी खासदारांना दिला.
शासकीय आधारभूत धान खरेदी केंद्र संचालकांच्या काही मागण्यांवर यावेळी चर्चा करण्यात आली. केंद्र संचालकांना आतापर्यंत 31 रुपये 25 पैसे प्रतिक्विंटल कमिशन दिले जात होते. ते कमी करून 20 रुपये 40 पैसे करण्यात आले आहे. यामुळे केंद्र संचालकांमध्ये नाराजीचा सूर असून हा मुद्दाही खासदारांनी पियुष गोयल यांच्या लक्षात आणून दिला. धान खरेदीवर आतापर्यंत एक टक्का घट ग्राह्य धरली जात होती. ही घट अर्धा टक्यांनी कमी करण्यात आली. भंडारा गोंदिया जिल्ह्यात उत्पादन अधिक आणि वेळेवर धनाची उचलत नसल्याने धानाच्या घटीची टक्केवारी एक पेक्षाही अधिक जाते. त्यामुळे किमान एक टक्का घट कायम ठेवण्यात यावी असा विषय खासदारांनी मांडला. त्या संधर्भात घेतल्या गेलेली धोरणे ही संपूर्ण देशासाठी एक असतात तरीसुद्धा तुमचा मुद्दा वस्तुस्थितीला धरून असेल तर या दृष्टीने वेगळा विचार करून सकारात्मक निर्णय घेण्यात येईल अशे आश्वासन मंत्री महोदयांनी यावेळी दिल्याचे खासदार सुनील मेंढे यांनी सांगितले.
