भंडारा नवप्रहार प्रतिनिधी/ हंसराज
भंडारा जिल्हा सामान्य रुग्णालयातील नवीन इमारतीला लागलेल्या गळतीमुळे रुग्णांची व नातेवाईकांची मोठी समस्या झाली आहे. सकाळपासून सुरु असलेल्या पावसामुळे भंडारा शहर जलमय झाले होते. नाले आणि रस्ते पाण्याने तुडुंब भरलेले होते, ज्यामुळे वाहतूक काही तास ठप्प राहिली. या जलमय स्थितीत सामान्य रुग्णालयाच्या नवीन इमारतीत छतामधून पाणी गळती सुरू झाल्याने रुग्णांच्या बेडवर आणि वारंड्यात पाणी साचले.
रुग्णांच्या नातेवाईकांना संपूर्ण रात्र जागून काढावी लागली. निकृष्ट बांधकामामुळे सामान्य नागरिकांना मोठा फटका बसला. विशेष म्हणजे, 2018 मध्ये बांधलेली ही इमारत निकृष्ट आणि दोषपूर्ण बांधकामामुळे अशा समस्यांचा सामना करीत आहे. संबंधित कंत्राटदार आणि तांत्रिक सहमती देणाऱ्या अधिकाऱ्यांवर कठोर कारवाई करण्याची मागणी प्रहार संघटनेचे भंडारा जिल्हाध्यक्ष अंकुश वंजारी यांनी केली आहे.
सामान्य जनतेला योग्य आरोग्य सेवा मिळावी आणि निकृष्ट काम करणाऱ्यांवर कारवाई व्हावी, अशी सर्वांची मागणी आहे. रोज हजारो नागरिक सामान्य रुग्णालयात उपचारासाठी येत असतात. अशा परिस्थितीत, रुग्णालयातील सुविधांची दुरुस्ती व देखभाल योग्य प्रकारे होणे आवश्यक आहे.
संपूर्ण भंडारा शहरात पावसामुळे निर्माण झालेल्या अडचणी आणि सामान्य रुग्णालयातील समस्यांचा सामना करणाऱ्या नागरिकांचे प्रश्न प्राधान्याने सोडवले जावेत, असे नागरिकांचे म्हणणे आहे. रुग्णालय व्यवस्थापनाने या बाबीची त्वरित दखल घ्यावी आणि सुधारणा कराव्यात, हीच अपेक्षा आहे.
संबंधित विभागांनी या घटनांची तातडीने चौकशी करून योग्य ती कारवाई करावी आणि भविष्यात अशा घटना होणार नाहीत याची खात्री द्यावी, असेही नागरिकांनी सांगितले आहे. जलमय स्थितीमुळे सामान्य रुग्णालयातील रुग्णांना व त्यांच्या नातेवाईकांना निर्माण झालेल्या समस्यांमुळे त्यांच्या आरोग्यावर विपरीत परिणाम होण्याची शक्यता आहे. त्यामुळे यावर त्वरित उपाययोजना होणे अत्यंत आवश्यक आहे.
