चित्रपट निर्माते विक्रम भट्ट यांना फसवणूक प्रकरणात अटक

ईटाइम्सच्या रिपोर्टनुसार, इंदिरा आयव्हीएफ हॉस्पिटलचे संस्थापक डॉ. अजय मुरदिया यांनी विक्रम यांनी त्यांना एका चित्रपट प्रोजेक्टमध्ये ३० कोटी रुपयांपेक्षा जास्त गुंतवणूक करण्यास प्रवृत्त केल्याचा आरोप करणारी तक्रार दाखल केली. त्यांना २०० कोटी रुपयांपर्यंत नफा देण्याचं आश्वासन देण्यात आलं होतं. २० दिवसांपूर्वी भूपालपुरा पोलिस ठाण्यात विक्रम भट्ट, त्यांची पत्नी आणि इतर सहा जणांविरुद्ध एफआयआर दाखल करण्यात आला होता.

एफआयआरनुसार, विक्रम भट्ट यांनी डॉ. मुरदिया यांच्या दिवंगत पत्नीवर बायोपिक बनवण्यास सहमती दर्शवली आणि सर्व काम करण्याचं आश्वासन दिलं. रिपोर्टनुसार, विक्रम भट्ट यांनी पैशांची मागणी केली आणि दावा केला की त्यांची पत्नी आणि मुलगी भागीदार म्हणून सहभागी आहेत. या प्रकल्पासाठी श्वेतांबरी भट्ट यांच्या नावाने व्हीएसबी एलएलपी नावाची कंपनी नोंदणीकृत होती.

डॉ. मुरदिया यांनी सुरुवातीला दिनेश कटारिया यांची मदत घेतली आणि कटारिया यांच्या सल्ल्यानुसार, ते २५ एप्रिल २०२३ रोजी मुंबईतील वृंदावन स्टुडिओमध्ये विक्रम भट्ट यांची भेट घेतली. या भेटीदरम्यान त्यांनी बायोपिक बनवण्यावर चर्चा केली. ‘तुमको मेरी कसम’ नावाचा हा चित्रपट मार्च २०२५ मध्ये प्रदर्शित झाला होता. त्यानंतर, नोव्हेंबरमध्ये, विक्रम भट्ट यांनी एनडीटीव्हीला दिलेल्या मुलाखतीत या आरोपांचं खंडन केलं. ते म्हणाले, ‘मी एफआयआर वाचलंय आणि मला वाटतं की ते दिशाभूल करणारं आहे. एफआयआरमधील मजकूर पूर्णपणे खोटा असल्यानं पोलिसांची पूर्णपणे दिशाभूल झाली आहे. त्यांनी काही कागदपत्रे बनावट केली असावीत. मला नक्की काय माहित नाही, परंतु पोलिसांना पटवून देण्यासाठी त्यांनी काहीतरी वापरलं असावं.’