आणखी एका राजकीय भूकंपाचे संकेत 

या सगळ्या घडामोडी एकीकडे घडत असताना महाराष्ट्राच्या राजकारणातील मोठी घडामोड समोर आली. ज्या नेत्यासाठी उद्धव ठाकरे यांनी थेट महविकास आघाडीशी पंगा घेतला होता. त्याच चंद्रहार पाटील यांनी गुरुवारी रात्री उशिरा एकनाथ शिंदे यांची भेट घेतली आहे. या गुप्त भेटीमुळे राजकीय वर्तुळात अनेकांच्या भुवया उंचावल्या आहेत. चंद्रहार पाटील ठाकरेंना सोडणार का? याबाबत देखील चर्चा रंगल्या आहेत.

चंद्रहार पाटील हे पहिलवान असून ते दोन वेळा महाराष्ट्र केसरी देखील राहिले आहेत. सध्या ते उद्धव ठाकरे यांच्या शिवसेनेत राज्य संघटक पदावर कार्यरत आहेत. मिळालेल्या माहितीनुसार, चंद्रहार पाटील आणि उपमुख्यमंत्री एकनाथ शिंदे यांची भेट झाली आहे. गुरुवारी (24 एप्रिल) रात्री उशिरा ही भेट झाली. शिवसेनेचे मंत्री उदय सामंत यांनीच चंद्रहार पाटील आणि एकनाथ शिंदे यांची भेट घडवून आणल्याचं म्हटलं जातंय. या भेटीवर चंद्रहार पाटील यांनी प्रतिक्रिया देखील दिली आहे. मी वैयक्तिक कामासाठी गेलो होतो. त्यावेळी माझी आणि उदय सामंत यांची भेट झाली, असं चंद्रहार पाटलांनी सांगितलं आहे.