बुटीबोरी MIDC  मध्ये पाण्याची टाकी कोसळली, टाकीखाली दबून तीन मजुरांचा मृत्यू

बुटीबोरी ( नागपूर ) / प्रतिनिधी

नागपूरच्या बुटीबोरी औद्योगिक क्षेत्रातील अवदा इलेक्ट्रो प्रायव्हेट लिमिटेड कारखान्यात शुक्रवारी सकाळी मोठी दुर्घटना घडली. पाण्याची टाकी कोसळल्याने तीन कामगारांचा जागीच मृत्यू झाला तर अनेक जण जखमी झाले. जखमींना उपचारासाठी रुग्णालयात दाखल करण्यात आले आहे.

पोलिसांनी दिलेल्या माहितीनुसार, एमआयडीसी बुटीबोरी परिसरात असलेल्या अवदा इलेक्ट्रो प्रायव्हेट लिमिटेड या सोलर पॅनल उत्पादन कारखान्यात सकाळी ९:३० च्या सुमारास हा अपघात झाला. कारखान्याच्या आवारातील एक मोठी पाण्याची टाकी अचानक कोसळली आणि अनेक कामगार ढिगाऱ्याखाली अडकले. माहिती मिळताच पोलिस आणि बचाव पथके घटनास्थळी पोहोचली आणि बचाव कार्य सुरू केले.