व्यापाऱ्याच्या हॉटेल मध्ये मृत्यू ; सोबत असलेली प्रेयसी गेली पळून 

लखनौ (युपी) / नवप्रहार ब्युरो

                    राजस्थान च्या जालोंर येथील व्यापाऱ्याचा मृतदेह हॉटेल च्या बाथरूम मध्ये संशयास्पद स्थितीत आढळला आहे. घटनेनंतर त्याच्या सोबत असलेल्या गर्लफ्रेंड ने घटनास्थळावरून पोबारा केला आहे. पोलीस तिचा शोध घेत आहेत. विशेष म्हणजे गर्लफ्रेंड व्यापाऱ्याच्या बायकोच्या आधारकार्ड वर हॉटेल मध्ये राहत होती. निलेश असे व्यापाऱ्याचे नाव आहे.

लखनौच्या चिनहट येथील एका हॉटेलच्या रूम नंबर २०८ मध्ये ही घटना घडली आहे. हॉटेल कर्मचाऱ्यांनी २० जानेवारी रोजी पोलिसांना एका गेस्टचा मृत्यू झाल्याची माहिती दिली. त्यानंतर पोलिसांनी तातडीने हॉटेल गाठलं आणि मृतदेह ताब्यात घेतला आणि शवविच्छेदनासाठी पाठवला. त्याच वेळी, पोलिसांना घटनास्थळी पाहून, बिझनेसमनसोबत हॉटेलमध्ये राहणारी महिला पळून गेली. सध्या पोलिसांनी हॉटेलच्या सीसीटीव्हीचा डीव्हीआर ताब्यात घेतला आहे आणि फुटेज तपासत आहेत.

मिळालेल्या माहितीनुसार, बिझनेसमन निलेश भंडारी हे मूळचे राजस्थानमधील जालोर येथील रहिवासी होते. त्यांचा बंगळुरू आणि सूरतमध्ये व्यवसाय होता. ते एका मीटिंगच्या निमित्ताने लखनौला आले होते. तेव्हा त्यांची गर्लफ्रेंड दोन दिवस हॉटेलमध्ये राहिली होती. याच दरम्यान, सोमवारी रात्री निलेश यांचा मृत्यू झाला.

पोलिसांना माहिती मिळाली की, निलेश बाथरूममध्ये आंघोळ करत असताना खाली पडले, त्यानंतर बेशुद्ध झाले आणि जेव्हा त्यांना रुग्णालयात नेण्यात आलं तेव्हा डॉक्टरांनी त्यांना मृत घोषित केलं. निलेश यांनी त्यांच्या पत्नीच्या आधार कार्डचा वापर करून आपल्या गर्लफ्रेंडला हॉटेलमध्ये प्रवेश मिळवून दिला होता. तपासादरम्यान पोलिसांना पत्नीचं आधार कार्ड सापडलं.

प्राथमिक तपासात असं दिसून आलं आहे की, निलेश यांच्या मृतदेहावर कोणत्याही जखमांच्या खुणा नाहीत. अशा परिस्थितीत, प्रश्न असा आहे की, निलेश यांच्यासोबत नेमकं असं काय घडलं, ज्यामुळे त्यांचा मृत्यू झाला. सध्या पोलीस शवविच्छेदन अहवालाची वाट पाहत आहेत. या घटनेने एकच खळबळ उडाली आहे.