पुन्हा निळा ड्रम चर्चेत , ड्रम मध्ये सापडला  मृतदेह

या घटनेने परिसरात एकच खळबळ माजली आहे. पोलिसांनी अवघ्या 36 तासात या गुन्ह्याचा छडा लावला आहे. निळ्या ड्रममध्ये आढळलेल्या त्या मृतदेहाचे रहस्य उघड झाले आहे. पोलिसांनी या प्रकरणी एका महिलेसह चार जणांना अटक केली असून, दोन अल्पवयीन मुलांचाही यात समावेश आहे. हे सर्व आरोपींवर गुन्हा दाखल करण्यात आला आहे.

लुधियाना शहरातील शेरपूर परिसरात बुधवारी (25 जून) एका निळ्या रंगाच्या ड्रममध्ये एक मृतदेह सापडला होता. या घटनेने परिसरात खळबळ उडाली होती. पोलिसांनी कसून तपास करत या रहस्यमय हत्याकांडचा पर्दाफाश केला आहे. मृताची ओळख मनोज उर्फ ​​राजू (राहणार भारती कॉलनी, गली नंबर 5, लुधियाना) अशी झाली आहे. त्याचा मृतदेह एका निळ्या रंगाच्या ड्रममध्ये एका निर्जन ठिकाणी फेकून देण्यात आला होता.

मृतदेहाची अवस्था पाहूनच ही हत्या किती क्रूरपणे केली गेली असावी, याचा अंदाज येत होता. पोलिसांनी मृतदेह शवविच्छेदनासाठी पाठवून या प्रकरणाची चौकशी सुरू केली. पोलिसांच्या तपासात असे समोर आले आहे की, ज्या रात्री ही घटना घडली, त्या रात्री सर्व आरोपी मद्यधुंद अवस्थेत होते. त्यांच्यात वाद झाला आणि आरोपींना मनोजला मारहाण करण्यास सुरुवात केली. यादरम्यान तो गंभीरपणे जखमी धाला आणि बेशुद्ध होऊन कोसळला आणि काहीच वेळात त्याचा मृत्यू झाला. त्यानंतर हे आरोपी घाबरले आणि त्यांनी त्या रात्री मनोजचा मृतदेह घरातच ठेवला. यानंतर, संधी मिळताच आरोपींनी मनोजच्या मृतदेहाला दोरीने बांधून एका निळ्या रंगाच्या ड्रममध्ये पॅक केले.

त्यानंतर ई-रिक्षाच्या साहाय्याने निळ्या रंगाचा ड्रम शेरपूरमधील एका निर्मनुष्य रिकाम्या भूखंडात फेकून दिला. बुधवारी जेव्हा त्या परिसरात तीव्र दुर्गंधी येऊ लागली तेव्हा लोकांनी निळ्या रंगाच्या ड्रममध्ये बघितले. त्यांना एक पोतं दिसूिन आलं, ज्यात मृतदेह होता. हे पाहून उपस्थितांना धक्काच बसला. त्यांनी पोलिसांना याची माहिती दिली. पोलिसांनी घटनास्थळी पोहोचून ड्रम उघडला आणि पोलिसांनी मृतदेह ताब्यात घेऊन शवविच्छेदनासाठी पाठवला. या प्रकरणाच्या तपासासाठी पोलीस अधिकारी करनवीर सिंह यांच्या नेतृत्वाखाली एक टीम तयार करण्यात आली. पोलिसांनी अज्ञात लोकांविरुद्ध खुनाचा गुन्हा दाखल केला.

तपासादरम्यान, पोलिसांनी सेफ सिटी प्रोजेक्टच्या कॅमेऱ्यांची मदत घेतली. फुटेज तपासताना पोलिसांना एक ई-रिक्षा दिसली, ज्यामध्ये काही लोक निळ्या रंगाचा जड ड्रम घेऊन जाताना दिसले. पोलिसांनी ई-रिक्षा चालक रोहितला ताब्यात घेतले. पोलिसांनी चौकशी केली असता, ई-रिक्षा चालकाने संपूर्ण प्रकरणाचा खुलासा केला. ई-रिक्षा चालकाने दिलेल्या माहितीच्या आधारावर पोलिसांनी 6 आरोपींविरुद्ध गुन्हा दाखल केला.

यापैकी फागू प्रसाद, उषा देवी, नीरज कुमार आणि सीटू कुमार यांना अटक करण्यात आली आहे. तर, दोन आरोपी अल्पवयीन आहेत. त्यांना किशोर न्याय कायद्यानुसार संबंधित न्यायालयात हजर करण्याची प्रक्रिया सुरू आहे. चारही आरोपींना न्यायालयात हजर करून पोलीस कोठडीत पाठवण्यात आले आहे. हत्येमागील खरे कारण शोधण्याचा पोलीस प्रयत्न करत आहेत. तरी भांडणातून ही हत्या झाल्याचे समोर येत आहे, पण पोलीस या प्रकरणाची प्रत्येक बाजूने तपासणी करत आहेत.