गोळीबारीच्या घटनेने जालन्यात खळबळ ; एकाचा मृत्यू 

जालना / नवप्रहार मीडिया 

                दिवसाढवळ्या झालेल्या गोळीबाराच्या घटनेने जालना शहर हादरले आहे. शहरातील मंठा चौफुलीवर असलेल्या होंडा शोरूम समोर काहीअज्ञातांनी गजानन फार यांच्यावर गोळीबार केला आहे. त्यात त्यांचा मृत्यू झाला आहे. ते अर्जुन खोतकर यांचे निकटवर्तीय होते.

           गोळीबारात  गंभीर जखमी झालेल्या तौर यांना   तातडीने शहातील खासगी रुग्णालयात दाखल करण्यात आलं होते. यावेळी रुग्णालयात माजी मंत्री अर्जुन खोतकर आणि शिवसेनेचे पदाधिकारी मोठ्या संख्येने उपस्थित होते. प्राथमिक माहितीनुसार मंठा चौफुली भागातील होंडा शोरूमसमोर ही गोळीबाराची घटना घडली आहे. गजानन तौर हे रामनगर कारखान्याकडून जालनाकडे त्यांच्या चारचाकी वाहनाने येत होते. पाठीमागून दुचाकीवरुन आलेल्या तिघांनी गजानन तौर यांच्या दिशेने गावठी पिस्तूलातून चार गोळ्या झाडल्या.

चार गोळ्यांपैकी तीन गोळ्या गजानन तौर यांना लागल्या, तर एक गोळी चाटून गेली. घटनेची माहिती कळताच वरिष्ठ पोलीस आधिकाऱ्यांनी फौजफाट्यासह घटनास्थळी धाव घेतली. सदरील घटनेची माहिती शहरात पसरताच घटनास्थळी तसंच खासगी रुग्णालयांमध्ये नागरिकांचा मोठा जमाव झाला होता. यानंतर पोलिसांचा फौजफाटा तैनात करण्यात आला.
तौर यांचा मृतदेह शासकीय रुग्णालयात पाठविण्यात आला असून पोलीस अधिक तपास करत आहेत.