नाराजीच्या अफवांवर एकनाथ शिंदे यांनी दिले स्पष्टीकरण

मुंबई / नवप्रहार डेस्क

                    महायुतीला अपेक्षे पलीकडे यश मिळून देखील सत्ता स्थापनेचा मुहूर्त अद्याप सापडला नाही. दरम्यान काळजीवाहू मुख्यमंत्री एकनाथ शिंदे हे आपल्या दरे गावी निघून गेल्याने ते नाराज असल्याची अफवा पसरली होती. पण दस्तुरखुद्द त्यांनी समोर येत स्पष्टीकरण  दिले आहे. पाहूया काय म्हणाले  एकनाथ शिंदे  यावेळी बोलताना त्यांनी विविध विषयांवर प्रतिक्रिया दिली.

नेमकं काय म्हणाले शिंदे?

एकनाथ शिंदे हे दरेगावला का गेले? ते नाराज आहेत का? असा सवाल सातत्यानं उपस्थित करण्यात येत होता. यावर बोलताना त्यांनी मोठा खुलासा केला आहे. सत्तास्थापन होत असताना गावी जायचं नाही का? असा प्रश्न त्यांनी केला आहे. पुढे बोलताना ते म्हणाले की, मी नेहमी गावी येत असतो. मी कॉमन मॅन म्हणून काम केलं आहे. मी एका सामान्य शेतकरी कुटुंबातून येतो. त्यामुळे मला माझ्या मुळगावी आल्यानंतर एक वेगळा आनंद होतो. आपल्या लोकांना भेटल्याचा आनंद मिळतो, असं एकनाथ शिंदे यांनी म्हटलं आहे.

यावेळी बोलताना त्यांनी मुख्यमंत्रिपदावर देखील प्रतिक्रिया दिली आहे. मुख्यमंत्री कोण असेल याचा निर्णय पंतप्रधान नरेंद्र मोदी आणि केंद्रीय गृहमंत्री अमित शाह हे घेतील. मी कॉमन मॅन म्हणून काम केलं. लाडकी बहीण, लाडका भाऊ, लाडक्या शेतकऱ्यांसाठी काम केलं. अडीच वर्षांमध्ये आम्ही भरभरून काम केलं. मी देखील शेतकरी कुटुंबातील असल्यामुळे मला सर्व सामान्य लोकांना काय पाहिजे याची चांगली जाणीव आहे. त्यामुळे लोकही या सरकारला आपलं लाडकं सरकार म्हणतात. महाविकास आघाडीने जे प्रकल्प रखडवले होते, त्याला आम्ही चालना दिली, लोकांनी देखील आम्हाला भरभरून प्रतिसाद दिला असं एकनाथ शिंदे यांनी म्हटलं आहे.