पायाच्या दुखण्याकडे करू नका दुर्लक्ष अन्यथा उद्भवू शकतो हृदयविकाराचा धोका

                छातीत दुखणे ,किंवा हात आणि पाठीला दुखण्याचा सबंध लोकं हार्ट अटॅक सोबत जोडतात. पण पायाशी सबंधित काही समस्या देखील हृदयविकाराच्या झटक्याचे लक्षण असू शकते असे डॉक्टर सांगतात. त्यामुळे पायाच्या दुखण्याकडे दुर्लक्ष करू नका असा सल्ला देखील डॉक्टर देत आहेत. 

हिवाळ्याच्या काळात हृदयरोगाचा धोका वाढतो आणि या काळात हृदयविकाराच्या घटनांमध्येही वाढ होते. पायांना सूज येणे, वेदना होणे व सुन्न होणे याकडे दुर्लक्ष करणे विशेषतः महागात पडू शकते. तर, पायांना येणारी सूज तुम्ही हलक्यात का घेऊ नये आणि ती गंभीर आजाराचे संकेत कसे देऊ शकते हे समजावून घ्या.

पायांच्या नसांचा आजार आणि हृदयाचा संबंध

तज्ज्ञांच्या मते, पायांमधील नसांमध्ये अडथळा किंवा नुकसान झाल्यास हृदयविकाराचा झटका आणि स्ट्रोकचा धोका वाढतो. वैद्यकीय भाषेत या समस्येला पेरिफेरल आर्टरीचा आजार म्हणतात. या आजारात पायांच्या धमन्यांमध्ये कोलेस्ट्रॉल जमा होऊ लागते, ज्यामुळे सूज येते आणि अडथळा निर्माण होतो. त्याचे परिणाम केवळ पायांपुरते मर्यादित नसून शरीराच्या इतर धमन्यांमध्ये, विशेषतः हृदयात अडथळा येण्याचा धोका वाढतो. पेरिफेरल आर्टरी डिसीजची लक्षणे हळूहळू दिसून येतात, जे लोक अनेकदा किरकोळ समजून दुर्लक्ष करतात. त्यामध्ये चालताना किंवा पायऱ्या चढताना पाय दुखणे किंवा क्रॅम्पिंग होणे, घोटे आणि बोटे यांमध्ये सूज येणे, पायांना थंडी वाजणे किंवा बधिरपणा येणे, त्वचेचा रंग निळा किंवा जांभळा, कोरडी त्वचा व नखे जाड होणे किंवा पिवळे होणे यांचा समावेश आहे. डॉक्टरांचे म्हणणे आहे की, पेरिफेरल आर्टरी डिसीजमध्ये पायांमध्ये ब्लॉकेज किंवा गुठळ्यादेखील हृदयाला नुकसान पोहोचवू शकतात. अशा रुग्णांना हृदयविकाराचा धोका जास्त असतो. लठ्ठपणा, उच्च रक्तदाब व शारीरिक हालचालींचा अभाव हे प्रमुख जोखमीचे घटक आहेत. जरी या परिस्थितीत प्रत्येक रुग्णाच्या हृदयाला थेट नुकसान पोहोचत नसले तरी त्यांना गंभीर जोखमीचे घटक मानले जाते.

हृदयविकाराच्या सुरुवातीच्या लक्षणांकडे दुर्लक्ष करू नका.

तज्ज्ञांचे म्हणणे आहे की, हृदयविकाराची सुरुवातीची अनेक लक्षणे इतकी सौम्य असतात की, लोक त्यांना वृद्धत्वाचे परिणाम मानून दुर्लक्ष करतात. तज्ज्ञांच्या मते, शारीरिक क्षमतेत हळूहळू घट, लवकर थकवा येणे, पाय व घोट्यांमध्ये सूज येणे, श्वास घेण्यास त्रास होणे आणि शरीरात पाणी साचणे ही हृदयविकाराची लक्षणे असू शकतात. त्याशिवाय शूज घट्ट वाटणे, पोट फुगणे, सकाळी चेहऱ्यावर सूज येणे, रात्री वारंवार लघवी होणे आणि कोणत्याही कारणाशिवाय खूप थकवा जाणवणे हीदेखील धोक्याची लक्षणे आहेत.

आपण स्वतःचे संरक्षण कसे करू शकतो?

डॉक्टरांचे म्हणणे आहे की, पायांमध्ये सूज, वेदना किंवा सुन्नपणा यांसारख्या लक्षणांना क्षुल्लक समजू नये, विशेषतः जर आधीच हृदयरोग असेल तर. हे साध्य करण्यासाठी डॉक्टर नियमित व्यायाम, चालण्याची सवय, संतुलित आहार आणि जास्त चरबी, रिफाईंड पीठ व लाल मांस टाळण्याची शिफारस करतात. तसेच मानसिक ताण कमी करणेदेखील महत्त्वाचे आहे.