बेलोना गावाची शान: रेवती हरिभाऊ राऊत यांची महसूल सहाय्यक पदावर निवड
हिवरखेड :-(जितेंद्र ना फुटाणे):- येथून तीन किलोमीटर अंतरावर असलेल्या बेलोना येथील रेवती हरिभाऊ राऊत यांनी मेहनत, जिद्द आणि चिकाटीच्या जोरावर महाराष्ट्र लोकसेवा आयोगाची (MPSC) परीक्षा उत्तीर्ण करून महसूल सहाय्यक (Revenue Assistant) पद मिळवले आहे.
रेवतीचा हा प्रवास प्रेरणादायी ठरला आहे. आर्थिकदृष्ट्या प्रतिकूल परिस्थितीत वाढलेल्या रेवतीने कठीण परिस्थितीला न जुमानता अपार मेहनतीने अभ्यास केला आणि आपल्या जिद्दीच्या जोरावर सरकारी नोकरी मिळवण्याचे स्वप्न पूर्ण केले.
रेवतीच्या यशाने तिच्या कुटुंबाचे स्वप्न साकार झाले. तिच्या वडिलांचे हे स्वप्न होते की, त्यांच्या मुलीने सरकारी अधिकारी व्हावे, आणि आज रेवतीने ते सत्यात उतरवले. आपल्या भावना व्यक्त करताना तिच्या वडिलांनी सांगितले, “तिने अहोरात्र अभ्यास केला, कधीही हार मानली नाही, आणि आज तिने आम्हाला अभिमान वाटावा असे यश मिळवले आहे.”
बेलोना गावाने तिच्या या यशाचे जल्लोषात स्वागत केले. अनेक तरुणींना तिच्या यशाने नवा आत्मविश्वास मिळाला आहे.
आपल्या यशाबद्दल बोलताना रेवती म्हणाली, “हे यश केवळ माझे नाही, तर माझ्या आई-वडिलांच्या त्यागाचे आणि संपूर्ण गावाच्या आशीर्वादांचे फळ आहे. मी प्रामाणिकपणे आणि निष्ठेने लोकांची सेवा करेन.”
रेवतीचा हा प्रवास ग्रामीण भागातील विद्यार्थ्यांसाठी प्रेरणादायी ठरला आहे. मेहनत आणि दृढ इच्छाशक्तीच्या जोरावर कोणतीही स्वप्ने सत्यात उतरू शकतात, हे तिने दाखवून दिले आहे.
