टॅक्सी चा स्पर्श आणि टॅक्सी चालकाचा अंत 

मृत व्यक्तीचे नाव राज मडवी असे आहे. पोलिसांच्या माहितीनुसार, काम संपवून घरी परत जात असताना, शनिवारी मध्यरात्री १ वाजण्याच्या सुमारास कल्याण-डोंबिवली महानगरपालिकेच्या ‘अ’ प्रभाग कार्यालयाजवळ राज मडवी याची कार एका स्कूटरला घासली. अपघातावरुन सुरु झालेला हा किरकोळ वाद नंतर हिंसक वळणावर पोहोचला.

आरोपींची ओळख वैभव भोईर, त्याची पत्नी रेणुका भोईर आणि त्यांचा मित्र सौरभ यादव अशी पटली आहे. तिघांचेही वय २५ ते ३० वर्षांच्या दरम्यान आहे.

पाठलाग करुन कॅब अडवली

पोलिसांनी सांगितले की, अपघातानंतर राजने गाडी थांबवली होती, त्यानंतर दोन्ही बाजूंनी शाब्दिक बाचाबाची झाली. त्यानंतर राजने गाडी थोडी पुढे नेली, परंतु स्कूटरवरील तिघांनी त्याचा पाठलाग करुन त्याला पुन्हा गाडी थांबवण्यास भाग पाडलं.

या दुसऱ्या वादादरम्यान, वैभवने धारदार शस्त्र काढून राजवर किमान तीन वार केले, त्यामुळे त्याच्या पाठीवर, पायावर आणि मांडीवर गंभीर जखमा झाल्या. त्यानंतर आरोपी जखमी चालकाला तिथेच सोडून घटनास्थळावरून पळून गेले.

वेळेत मदत न मिळाल्याने मृत्यू

ही घटना एका निर्जन ठिकाणी घडली, त्यामुळे हल्ल्याच्या वेळी तिथे कोणीही प्रत्यक्षदर्शी उपस्थित नव्हते. वेळेवर वैद्यकीय मदत न मिळाल्यामुळे, अतिरक्तस्रावामुळे राजचा घटनास्थळीच मृत्यू झाला, असे पोलिसांनी सांगितले.

घटनेची माहिती मिळताच खडकपाडा पोलीस तातडीने घटनास्थळी पोहोचले आणि त्यांनी तपासणीसाठी फॉरेन्सिक पथकाला पाचारण केले. त्यानंतर मृतदेह कायदेशीर प्रक्रिया पूर्ण करण्यासाठी स्थानिक रुग्णालयात नेण्यात आला.

खडकपाडा पोलीस ठाण्याचे वरिष्ठ पोलीस निरीक्षक राजेंद्र खेडेकर म्हणाले, “माहिती मिळाल्यानंतर आमच्या पथकांनी एकत्रित काम केले. सीसीटीव्ही फुटेज आणि स्थानिक माहितीच्या आधारे आम्ही आरोपींचा शोध घेतला आणि त्यांना वडवली गावातील त्यांच्या राहत्या घरातून पकडले.”