डीजे चा आवाज कमी करण्याच्या कारणावरून लहान भावाने केली थोरल्याची हत्या 

सतना / नवप्रहार मीडिया

              मागील काळात ‘  डीजे वाले बाबूं मेरा गणा चला दो ‘ हे गाणे भलतेच पॉप्युलर झाले होते. प्रत्येक कार्यक्रमात हे गाणे वाजल्या शिवाय कार्यक्रमाला रंगत येत नव्हती. पण हाच डीजे एका कुटुंबात कलहाचे कारण बनला आहे. डीजे चा आवाज कमी करण्यावरून दोन भावात झालेल्या भांडणात लहान भावाने मोठ्याचा कुऱ्हाडीने घाव घालून खून केला आहे.

मिळालेल्या माहितीनुसार, सतनातील कोठी पोलिस स्टेशन हद्दीतील मौहर गावात शुक्रवारी रात्री ही घटना घडली. राकेश(35) याच्या घरात एका कार्यक्रमाचे आयोजन करण्यात आले होते. यावेळी डीजेवर मोठ्या आवाजात गाणे सुरू होते. राकेश यांनी आवाज कमी केला, त्यामुळे त्यांचा लहान भाऊ राजकुमार(30)ने वाद घातला. हा वाद इतका वाढला की, आरोपीने मोठ्या भावावर कुऱ्हाडीचे वार केले.

हत्येनंतर आरोपी घटनास्थळावरुन पळून गेला, पण नंतर पोलिसांनी त्याला ताब्यात घेतले. आरोपीने गुन्ह्यात वापरलेले शस्त्रही जप्त करण्यात आले आहे. ही हत्या फक्त गाण्याच्या आवाजामुळे झाली की, इतर काही कारण आहे, याचा पोलीस तपास करत आहेत. दरम्यान, या घटनेमुळे परिसरात एकच गोंधळ उडाला आहे.