शिवसेनेचे दोन्ही उमेदवार एकाच नाण्याच्या दोन बाजु- अॅड. शेख अल्ताफ
प्रतिनिधी यवतमाळ
यवतमाळ वाशिम लोकसभा मतदार संघातील दोन्ही शिवसेनेचे उमेदवार एकाच नाण्याच्या दोन बाजु आहे. हे उमेदवार दलित, ओबीसी, आदिवासी, मुस्लीम समाजाला न्याय देऊ शकत नाही. त्यामुळे आम्ही नुर अली महेबूब अली शहा यांना इंडियन नॅशनल लीग चा पाठींबा जाहिर केला आहे. या माध्यमातून आम्ही अल्पसंख्यांक समाजाची ताकद वाढवून त्यांना इतर निवडणूकांमध्ये संधी उपलब्ध करुन देणार असल्याची माहिती इंडियन नॅशनल लीग चे महाराष्ट्र प्रदेश अध्यक्ष अॅड. शेख अल्ताफ अहमद यांनी दिली. ते यवतमाळ येथे आयोजित पत्रकार परीषदेत बोलत होते.
देशात भाजपाचे सरकार आहे. त्यांच्या विरोधात इतर देशभरातील विविध राजकीय पक्षांनी इंडीया आघाडी तयार केली आहे. प्रत्यक्षात मुस्लीम समाजाच्या मतांचा वापर केला गेला मात्र त्यांना न्याय मिळाला नसल्याचे दिसून येते. मुस्लीमांविरोधात अनेक कायदे पारीत करण्यात आले तेव्हाही कॉग्रेस सह इतर राजकीय पक्षांनी प्रत्यक्ष किंवा अप्रत्यक्ष त्यांना मदत करण्याचा प्रयत्न केला. त्यामुळे आम्ही स्वतंत्र निर्णय घेऊन यवतमाळ वाशिम लोकसभा मतदार संघात नुर अली महेबूब अली शहा यांना पाठींबा जाहिर केल्याचे शेख अल्ताफ यांनी सांगीतले.
राजकीय पक्ष निवडणूकीत आपला जाहिरनामा प्रसिध्द करतात. यामध्ये कधीच अल्पसंख्यांक समाजावर होणा-या अन्यायाची वाच्यता केली जात नाही. राज्यात महाविकास आघाडीत मुस्लीमांच्या मतांचा विचार केला जातो मात्र त्यांना न्याय देण्याचा विचार केला जात नाही. देशातील गरीब, दलित, मुस्लीम शोषीत समाजाला सोबत न घेता तसेच त्यांना सशक्त न करता देशाला पुढे नेणे शक्य नसल्याचे सुध्दा इंडियन नॅशनल लीग चे राष्ट्रीय उपाध्यक्ष सय्यद अफसर अली यांनी सांगीतले. पत्रकार परीषदेला अहेमद शेख महाराष्ट्र प्रदेश सचिव, उमेदवार नुरअली महेबुब अली, वासीफ जागीरदार, मंजुर अली नौशाद मो. गौस, मो अतीख मो रफीख, मो. अरहार उपस्थित होते.
