सरवणकरांची माघार नाहीच ; राज ठाकरे यांची भेट घेण्याची तयारी

मुंबई / नवप्रहार डेस्क

                 विधानसभा मजवडणुकीची रणधुमाळी सुरू झाली आहे. राज्यात बारामती आणि माहीम मतदार संघात काटे की टक्कर होणार असल्याचे भाकीत वर्तविण्यात येत आहे. सरवणकर यांनीं उमेदवारी मागे घ्यावी ही भाजपा ची इच्छा आहे. तर त्यासाठी मुख्यमंत्री शिंदे यांनी सुद्धा प्रयत्न केले आहेत. पण सदा सरवणकर मानायला तयार नाहीत. उलट त्यांनी त्यांची मनसे अध्यक्ष राज ठाकरे यांची भेट घेण्याची इच्छा असून त्यासाठी त्यांनी राज ठाकरे यांची वेळ मागीतल्याचे म्हटले आहे.

दरम्यान मुंबईच्या माहीम विधानसभा मतदारसंघात यंदा काटे की टक्कर पाहायला मिळणार आहे. या मतदारसंघातून यावेळी पहिल्यांदाच मनसेप्रमुख राज ठाकरे यांचे पुत्र अमित ठाकरे हे निवडणुकीच्या रिंगणात आहेत. तर दुसरीकडे शिवसेना शिंदे गटाकडून सदा सरवणकर हे निवडणूक लढवत आहेत. तर महाविकास आघाडीकडून महेश सावंत यांना उमेदवारी देण्यात आली आहे.

दरम्यान समोर आलेल्या माहितीनुसार अमित ठाकरे यांच्यासाठी सदा सरवणकर यांनी माघार घ्यावी यासाठी भाजपकडून प्रयत्न सुरू असल्याची माहिती समोर आली होती. भाजपकडून याबाबत शिवसेनेची देखील मनधरणी करण्यात आल्याचं वृत्त समोर आलं होतं, आता या पार्श्वभूमीवर महायुतीचे उमेदवार सदा सरवणकर यांनी प्रतिक्रिया दिली आहे.

नेमकं काय म्हणाले सरवणकर?

सरवणकर यांनी आपण माघार घेणार नसल्याचं स्पष्ट केलं आहे. ‘इथला मतदारसंघ आणि माझं आई मुलाच नातं आहे, त्यात खंड पडू देऊ नये. मी माघार घेणार नाही. मी या मतदारसंघात 365 दिवस उपलब्ध आहे असं सरवणकर यांनी म्हटलं आहे.’ त्यामुळे आता अमित ठाकरे आणि सरवणकर यांच्यामध्ये या मतदारसंघात लढत अटळ असल्याचं जवळपास स्पष्ट झालं आहे.

सदा सरवणकर यांनी आपला उमेदवारी अर्ज मागे घ्यावा यासाठी त्यांच्यावर मुख्यमंत्र्यांकडून दबाव असल्याची देखील चर्चा होती. यावर देखील त्यांनी प्रतिक्रिया दिली आहे. यामध्ये कुठलंही तथ्य नाही, मी शिवसेना, भाजप, राष्ट्रवादीचा अधिकृत उमेदवार आहे. एबी फॉर्म बीना आशिर्वादाचा भेटत नाही. मी फॉर्म भरला आहे, मला जनतेचा आशिर्वाद आहे. कार्यकर्ते दिवाळी साजरी करत आहेत, असं सरवणकर यांनी म्हटलं आहे.

दरम्यान राज ठाकरे यांच्या भेटीबाबत देखील सरवणकर यांनी माहिती दिली आहे. राज ठाकरे साहेबांना मी वेळ मागितली आहे, वेळ देतील तेंव्हा भेटणार आहे. माझी इच्छा आहे त्यांनी मला आशिर्वाद द्यावा. मी त्यांना विनंती करणार आहे, या मतदारसंघात आई आणि मुलाचं नातं आहे. त्यांला खंड पडू देऊ नका, अस सरवणकर यांनी म्हटलं आहे.