पोहायला गेलेल्या दोन मित्रांचा बुडून मृत्यू ; सुटी  मित्रांच्या जीवावर बेतली तर मुलगा गेला वाहून 

मुंबई / नवप्रहार मीडिया नेटवर्क 

                 राज्यात पावसाने कहर केला आहे. जोरदार पाऊस झाल्याने अनेक नदी नाल्यांना पूर आला आहे. पुराच्या पाण्यात वाहून जाण्याच्या घटना राज्यात सगळीकडे घडत आहेत.भिवंडीत  गोंदिया आणि अमरावती जिल्ह्यात घडलेल्या घटनेत मुलांचा दुर्दैवी मृत्यू झाला आहे. 

          भिवंडी शहरात पोहण्यासाठी गेलेल्या दोन मित्रांचा पाण्यात बुडून मृत्यू झाला आहे. माती खणलेल्या खड्ड्यात पाणी साचल्याने काही मुलं त्याठिकाणी पोहायला गेले होते. त्यातील दोन मुलांचा मृत्यू झाला .ही घटना शनिवारी सायंकाळी भिवंडी शहरातील पोगाव डोंगरपाडा परिसरात घडली आहे.अली अन्वर शेख (वय 17 वर्ष) व सानीब रईस अन्सारी (वय 16 वर्ष) असे पाण्यात बुडून मृत्यू झालेल्या दोघा मुलांची नावे आहेत.

मित्रांनी दिलेल्या माहिती नुसार अली व सानीब हे दोघेही शांतीनगर परिसरात राहणारे होते. पोगाव डोंगरपाडा येथे खड्ड्यांमध्ये जमा झालेल्या पाण्यामध्ये अंघोळीसाठी मित्रां सोबत गेले होते. मात्र, पाण्याचा अंदाज न आल्याने दोघेही पाण्यात बुडाले. ही घटना इतर मित्रांनी शेजारील नागरिकांना सांगितल्यानंतर नागरिकांनी घटनास्थळी धाव घेत दोन्ही मुलांना पाण्याबाहेर काढले. मात्र, तोपर्यंत मुलांचा मृत्यू झाला असल्याचे येथील नागरिकांनी सांगितले.

त्यानंतर दोन्ही मुलांचे मृतदेह शवविच्छेदनासाठी भिवंडीतील स्व. इंदिरा गांधी शासकीय उपजिल्हा रुग्णालयात रवाना करण्यात आले आहेत. या घटनेप्रकरणी भिवंडी तालुका पोलीस ठाण्यात नोंद करण्यात आली आहे.

तर युवक राहत असलेल्या परिसरात शोककळा पसरली आहे. या ठिकाणी मागील चार वर्षात अशा पाण्यात बुडून मुलांचा दुर्दैवी मृत्यू होत असल्याच्या अनेक घटना घडल्या आहेत. मात्र, त्याकडे कोणीही लक्ष देत नाही. प्रशासन आणखी किती मुलांचा जीव घेणार? असा संतप्त सवाल येथील स्थानिक नागरिकांनी केला आहे.

         दुसरी घटना गोंदिया जिल्ह्यातून समोर येत आहे.  तालुक्यातील मुंडीपार (खुर्द) येथील पांगोली नदीपात्रात बुडून दोन शाळकरी मुलांचा मृत्यू झाला. ही हृदयद्रावक घटना शनिवारी (ता. २९) दुपारी दीडच्या सुमारास घडली. गंगाधर भिवाजी भरणे (वय १६) व आर्यन शैलेशकुमार शहारे (वय १६, दोघेही रा.मुंडीपार) अशी मृतांची नावे आहेत.