फिरायला आलेल्या महिलेने केली आत्महत्या 

अलिबाग / नवप्रहार डेस्क

                हिमाचल प्रदेश येथे आर्ट ऑफ लिविंग चे शिक्षण देणाऱ्या आणि मूळची गोरेगाव (मुंबई) येथे राहणाऱ्या महिलेने अलिबागमधील एका कॉटेजमध्ये विष प्राशन करून आत्महत्या केली. नेहा अविनाश पोतदार (३४) असे तिचे नाव आहे.

आर्ट ऑफ लिव्हिंगची शिक्षिका असलेली नेहा ही गेल्या काही दिवसांपासून हिमाचल प्रदेशमध्ये आर्ट ऑफ लिव्हिंगचे शिक्षण देत होती. तेथून ती ३० सप्टेंबर रोजी अलिबागला आली होती. अलिबागच्या कुरूळ येथील एका कॉटेजमध्ये ऑनलाइन बुकिंग करून राहिली होती. बुधवारी सकाळी ती रूमबाहेर आली नसल्याने कर्मचाऱ्याने दरवाजा वाजवला. मात्र, आतून कोणताच प्रतिसाद न मिळाल्याने पोलिसांना पाचारण करण्यात आले.

पोलिसांनी दरवाजा उघडला असता नेहा मृतावस्थेत आढळली. नेहाने आपले आयुष्य संपवण्यापूर्वी एक चिठ्ठी लिहून ठेवली होती. त्यात तिने या घटनेला कोणालाही जबाबदार धरू नये, असा मजकूर लिहिला आहे. तसेच कॉटेजचे भाडे व जेवणावाल्याचे उर्वरित पैसेही तिने तेथे ठेवले होते. नेहाच्या मृतदेहाचा पंचनामा झाल्यानंतर तिचा मृतदेह शवविच्छेदन करून तिच्या नातेवाईकांकडे सोपवण्यात आल्याची माहिती पोलिसांनी दिली आहे