विचित्र अपघाता नंतर कार ने घेतला पेट तिघांचा होरपळून मृत्यू

मृत्यू झालेले तिघे जण खेड तालुक्यातील राक्षेवाडी येथील प्राथमिक माहिती

पुणे / नवप्रहार मीडिया 

पुणे – नाशिक महामार्गावर पुण्याकडे जाणाऱ्या मार्गावर एक कंटेनर बंद पडला होता. रस्त्याच्या कडेला कंटेनर उभा होता. या मार्गावर सकाळी टेम्पो आणि स्विफ्ट कारमध्ये आधी जोरदार धडक झाली. त्यानंतर टेम्पो पुढे रस्त्याच्या कडेला उभ्या असलेल्या कंटेनरवर धडकला. तर धडक होताच स्विफ्ट कारने पेट घेतला. या आगीत कारमधील तिघांचा होरपळून मृत्यू झाला. सुदैवाने कारचा चालक आणि टेम्पोचा चालक अपघातातून थोडक्यात बचावले.

अपघातात एक जण गंभीर जखमी झाला आहे. त्याला जवळच्या रुग्णालयात उपचारासाठी दाखल केले आहे. कार‌ चालकाचे गाडीवरील नियंत्रण सुटल्यामुळे हा अपघात झाल्याची शक्यता वर्तवली जात आहे. या अपघातात मृत्यू झालेल्यांची नावे अजून मिळाली नाही. या प्रकरणी मंचर पोलिस ठाण्यात गुन्हा दाखल करण्यात आला आहे. आता पुढील तपास मंचर पोलीस करत आहेत.दरम्यान, पहाटे झालेल्या या अपघातानंतर महामार्गावर काही काळ वाहतूक कोंडी झाली होती. मंचरमधील वाहतूक शाखेच्या पोलिसांनी घटनास्थळी धाव घेतली. त्यांनी रस्त्यावर असलेली अपघातग्रस्त वाहने क्रेनच्या मदतीने बाजूला केली. त्यानंतर पुणे-नाशिक मार्गावरील वाहतूक सुरळीत सुरू झाली. या अपघातात तिन्ही वाहनांचे मोठे नुकसान झाले आहे. स्विफ्ट कार तर संपूर्णपणे जळून खाक झाली आहे.