पार्किंग मुळे झालेली ओळख, प्रेमसंबंध आणि हत्या 

20 वर्षीय तरुणीची हत्या करून तिला जमिनीत पुरले 

हत्येला आत्महत्या भासवण्याचा प्रयत्न 

छत्रपती संभाजी नगर / विशेष प्रतिनिधी 

                     मोनिका सुमित निर्मळ ही 30 वर्षीय विवाहित महिला ही पती पासून बीभक्त राहत असल्याने ती माहेरी जालना येथील जमुना नगर भागात  वास्तव्यास होती. ती संभाजी नगर येथील महापालिकेच्या  आयुष्यमान रुग्णालयात कार्यरत होती. जालना ते छत्रपती संभाजी नगर येथे ये जा करत होती. दरम्यान ती आपली दुचाकी पार्किंग मध्ये ठेवत असल्याने त्याठिकाणी काम करणाऱ्या इरफान सोबत तिची ओळख झाली. आणि याच इरफानने तिचा खून करून ती आत्महत्या दर्शविण्याचा प्रयत्न केला. पण पोलिसांपुढे त्याचा टिकाव  लागला नाही. 

६ फेब्रुवारी रोजी संभाजीनगर येथे ड्युटीवर गेलेली मोनिका ही रात्री उशिरापर्यंत जालन्यात घरी परत आलीच नाही.तिचा मोबाईलही लागत नव्हता,त्यामुळे चिंतातुर झालेल्या आईने दुसऱ्या दिवशी थेट कदीम जालना पोलीस ठाणे गाठून तक्रार दाखल केली.

दोन दिवसांनी मोनिकाच्या मोबाईलवरून तिच्या नातवाईकांना मॅसेज आला कि मी सुखरूप असून मी लग्न केले आहे.आता मी तुम्हाला एक वर्षांनंतरच भेटायला येईन, अशा आशयाचा खोटा मेसेज आला.या मोबाईलवरवर फोन केला असता तो पुन्हा लागलाच नाही, त्यामुळे नातेवाईकांच्या मनात शंका निर्माण झाली.

नातेवाईकांनी थेट पोलीस अधीक्षक अजयकुमार बन्सल यांची भेट घेऊन याप्रकरणात तत्काळ लक्ष घालण्याची मागणी केली होती.पोलीस अधीक्षकांनी या प्रकरणी कदीम जालना पोलिसांना तत्काळ कारवाई करण्याच्या सूचना देताच पोलिसांची तपासचक्रे गतीने फिरली.

मोनिकाचा पुरलेला मृतदेह काढला बाहेर

इरफानला भेटण्यासाठी मोनिका ही ६ फेब्रुवारी रोजी रेल्वेने लासूर येथे गेली होती. लासूर येथून जवळच असलेल्या शेतात मोनिकाला घेऊन इरफान गेला होता.शेतात असलेल्या पडीक घरात असलेल्या लोखंडी अँगलला गळफास घेऊन तिने आत्महत्या केली असून त्यानंतर तिचा मृतदेह याच ठिकाणी पुरल्याचे सांगितले होते.

दरम्यान, कदीम जालना पोलिसांनी संभाजीनगर ग्रामीणच्या शिलेगाव पोलिसांची मदत घेत गंगापूरचे तहसीलदार यांच्या समक्ष इरफान याने पुरलेला मोनिका हिचा मृतदेह बाहेर काढला. त्यांनतर घटनास्थळीच वैद्यकीय अधिकाऱ्यांना पाचारण करून उत्तरीय तपासणी करण्यात आली आहे.त्याठिकाणी मोनिकाच्या अंगावरील कपडे जाळल्याचेही आढळून आले आहे.दरम्यान, इरफानने मोनिकाने आत्महत्या केल्याचा केलेला बनाव खोटा असून त्यानंच फाशी देऊन नंतर पुरावा नष्ट करण्यासाठी तिचा मृतदेह पुरून टाकला असावा, असा अंदाज आहे.

दररोजच्या भेटीने जुळले प्रेमसंबंध

संभाजीनगर रेल्वे स्थानकापासून रुग्णालयात येण्या-जाण्यासाठी तिच्याकडे असलेली दुचाकी ती रेल्वे स्थानकावरील वाहनतळावर उभी करत असे.दररोजच्या भेटीमुळे मोनिका आणि वाहनतळावर काम करणारा शेख इरफान शेख पाशा (३५) हे चांगलेच परिचित होते.त्यातून ते एकमेकांशी बोलायचे.दररोजच्या भेटीमुळे या दोघांचे प्रेमसंबंध जुळल्याचा अंदाज आहे.

सीसीटीव्ही फुटेज, कॉल डिटेल्स ठरला महत्त्वाचा पुरावा

पोलिसांनी मोनिकाचा प्रियकर शेख इरफान शेख पाशा (रा. लासूर स्टेशन) यास ताब्यात घेऊन चार दिवसांपूर्वी जालना येथे आणून चौकशी केली होती. मात्र, त्याने आपल्याला काहीच माहिती नसल्याचे सांगितल्याने त्याला सोडून दिले होते.आरोपीला सोडून दिले असले तरी त्याच्या संशयास्पद हालचालींवर पोलिसांचे बारकाईने लक्ष होते.पोलिसांनी इरफानच्या मोबाईलच्या कॉल डिटेल्स सोबतच लासूर स्टेशन येथील काही सीसीटीव्ही फुटेज काढून ते तपासले होते.मोनिका हिच्या सोबतचे तासन्तास केलेले मोबाईल संभाषण आणि ६ फेब्रुवारीला लासूर स्टेशन येथे फुटेजमध्ये मोनिका व इरफान दिसल्याचे निष्पन्न झाले.त्यामुळे इरफान शेख याच्यावर अधिकच संशय बळावल्याने पोलिसांनी त्यास गुरुवारी पुन्हा ताब्यात घेतले.त्याला पोलिसी खाक्या दाखवताच त्याने अखेर तोंड उघडले.