कारची दुचाकीला धडक ; पती पत्नीचा मृत्यू 

भंडारा / नवप्रहार मीडिया

              तुमसर मार्गावरील खापा येथे एका दुचाकीला कार ने दिलेल्या धडकेमुळे दुचाकीवर बसलेल्या पती पत्नीचा मृत्यू झाला आहे. दुचाकीला ओव्हरटेक करण्याच्या नादात कार चालकाचे वाहनावरील नियंत्रण सुटल्याने हा अपघात घडला असल्याचे सांगितले जात आहे.

पोलिसांनी दिलेल्या अधिक माहितीनुसार,भोजराम कोल्लू राणे (५५) तर रत्ना भोजराम राणे (५०) रा.सालई खुर्द  हे आपल्या दुचाकीने तुमसर येथे आपल्या नातेवाईका कडे गेले होते.

त्यांना भेटून पती पत्नी रामटेक – तुमसर महामार्गाने  आपल्या गावाकडे परत जात असताना खापा शिवारात विरूद्ध दिशेने येणाऱ्या कारच्या चालकाने कार निष्काळजीपणे चालवून ओव्हरटेक करण्याच्या प्रयत्न केला. ओव्हरटेक करताना मोटारसायकलला धडक बसली. यात दुचाकीस्वार पती-पत्नी गंभीर जखमी झाले.

पोलिसांना घटनेची माहिती मिळताच त्यांनी घटनास्थळी धाव घेतली. पती-पत्नी दोघांनाही उपचाराकरीता उपजिल्हा रूग्णालय तुमसर येथे पाठविण्यात आले. परंतू जखमींची प्रकृती चिंताजनक असल्याने पती-पत्नी दोघांनाही पुढे भंडाऱ्याला हलविण्यात आले. येथे पतीचा मृत्यू झाला. तर पत्नीला पुढे नागपुरला नेण्यात आले तेव्हा वाटेतच त्यांचीही प्राणज्योत मालवली.

पती-पत्नीचा अपघातात मृत्यू झाल्याने सालई खुर्द येथे शोककळा पसरली आहेच. तुमसर पोलिसांनी कार चालकाविरूद्ध गुन्हा दाखल केला आहे तसेच पुढील कारवाई सुरू आहे.