अकोट शहरात बनावटी नोटा चालविणारे रॅकेट सक्रिय 

पोलिस विभागाने विशेष लक्ष देण्याची गरज

अकोला /विशेष प्रतिनिधी

महाराष्ट्रातील बाजारपेठांमध्ये सध्या एका विचित्र आणि भीतीदायक गुन्हेगारी प्रकाराने सर्वांची झोप उडवली आहे. अकोला जिल्ह्यातील अकोट शहरात बनावट नोटांचे एक मोठे रॅकेट सक्रिय झाल्याचे धक्कादायक वास्तव समोर आले असून, यामध्ये एका रहस्यमयी महिलेचा वावर चर्चेचा विषय ठरला आहे.

तोंडाला स्कार्फ बांधून येणारी ही महिला छोट्या व्यावसायिकांना लक्ष्य करत असून, यामागे एखादी मोठी आंतरराज्य टोळी कार्यरत आहे का? असा प्रश्न आता उपस्थित होत आहे.(Fake Notes)

​अकोटमध्ये नेमकं काय घडलं?

शहरातील गजबजलेल्या नरसिंग महाराज रोडवर चप्पल दुरुस्तीचा व्यवसाय करणाऱ्या एका छोट्या दुकानदाराला या टोळीने आपला शिकार बनवले. एका महिलेने तोंडाला स्कार्फ बांधून गर्दीचा फायदा घेत या दुकानदाराला ५०० आणि १०० रुपयांच्या बनावट नोटा देऊन गंडवले. दुकानदाराला या फसवणुकीचा पत्ता व्यवहार पूर्ण झाल्यावर दुसऱ्या दिवशी लागला, जेव्हा त्याने नोटांची मोजणी केली. हुबेहूब खऱ्या नोटांसारख्या दिसणाऱ्या या बनावट नोटा पाहून पोलीस प्रशासनही चक्रावून गेले आहे.

​जुनाच पॅटर्न, नवा बळी!

धक्कादायक बाब म्हणजे, हा प्रकार अकोटमध्ये पहिल्यांदाच घडलेला नाही. यापूर्वी २० जुलै २०२५ रोजी सुद्धा श्रीराम सुपर शॉपीमध्ये एका महिलेने अशाच प्रकारे ५०० रुपयांच्या बनावट नोटा चलनात आणल्या होत्या. वर्षभराच्या कालावधीनंतर पुन्हा तोच ‘पॅटर्न’ समोर आल्याने अकोल्यात बनावट नोटांचे रॅकेट पुन्हा एकदा डोके वर काढत असल्याचे स्पष्ट होत आहे. विशेषतः रस्ते विक्रेते, छोटे दुकानदार आणि अल्पशिक्षित व्यावसायिकांना ही टोळी लक्ष्य करत आहे.

​महिलांचा वापर आणि ‘स्कार्फ’चे रहस्य

आतापर्यंत समोर आलेल्या प्रकरणांमध्ये एक साम्य आढळले आहे, ते म्हणजे बनावट नोटा चलनात आणण्यासाठी महिलांचा वापर केला जात आहे. गर्दीच्या वेळी आणि घाईत असलेल्या दुकानदारांकडे या महिला जातात. ओळखी पटू नये म्हणून चेहऱ्यावर स्कार्फ बांधलेला असतो, ज्यामुळे सीसीटीव्ही किंवा प्रत्यक्षदर्शींना त्यांची ओळख पटवणे कठीण जात आहे. ५०, १०० आणि ५०० रुपयांच्या या नोटा इतक्या हुबेहूब आहेत की सर्वसामान्यांना त्यातील फरक ओळखणे जवळपास अशक्य होत आहे.

​या प्रकारामुळे संपूर्ण अकोला जिल्ह्यात खळबळ उडाली असून, व्यापाऱ्यांमध्ये भीतीचे वातावरण आहे. हे रॅकेट फक्त अकोल्यापुरते मर्यादित आहे की राज्याच्या इतर भागातही पसरले आहे, याचा तपास आता यंत्रणांना करावा लागणार आहे.