उपचारासाठी पैसे नसल्याने रुग्णालयाने हाकललेल्या महिलेने दारातच दिला बाळाला जन्म ; थंडीमुळे बाळाचा मृत्यू

बदायूचे जिल्हाधिकारी मनोज कुमार यांनी सांगितलं की हे प्रकरण गंभीर आहे. रुग्णालयातील कर्मचाऱ्यांकडून महिलेला अत्यंत वाईट वागणूक देण्यात आली आहे. या प्रकरणी न्यायालयीन चौकशीचे आदेश दिले आहेत. तीन दिवसात तपास करून रिपोर्ट सादर केला जाणार आहे. यात दोषी डॉक्टर आणि मेडिकल स्टाफवर कठोर कारवाई केली जाईल. अशा प्रकारचा बेजबाबदारपणा सहन केला जाणार नाही.

महिलेच्या कुटुंबियांनी दिलेल्या माहितीनुसार, बदायू शहरातील कबूल पुरा इथं राहणाऱ्या रवि नावाच्या व्यक्तीची पत्नी नीलमला प्रसूतीसाठी जिल्हा महिला रुग्णालयात नेण्यात आलं होतं. रविने आरोप केला की रुग्णालयात डॉक्टर नव्हते. कर्मचाऱ्यांनी पत्नीला दाखल करण्यास नकार दिला. तपासणी करण्याच्या नावावर पाच हजार रुपयांची मागणी केली.

पैसे देण्यासाठी नसल्याचं सांगताच जिल्हा रुग्णालयातील कर्मचाऱ्यांनी धक्के देऊन गर्भवती नीलमसह कुटुंबियांना बाहेर काढलं. रविने सांगितलं की, लोक नीलमला घेऊन रुग्णालयाच्या गेटवर आलो. पण तिला प्रसूतीवेदना सुरू झाल्या आणि तिथेच प्रसूती झाली. मात्र प्रचंड थंडी आणि उपचार न मिळाल्याने बाळाचा मृत्यू झाला.