दिराकडे राहणाऱ्या पत्नी आणि दोन मुलांची पती कडून हत्या 

आरोपी पती फरार 

ठाणे / नवप्रहार मीडिया

              अखंड बेवडा असलेल्या पतीच्या त्रासाला कंटाळून पत्नी आपल्या दोन मुलांना घेऊन दिराकडे राहायला गेली असता पत्नी आणि मुलांना भेटण्याच्या बहाण्याने तेथे पोहचलेल्या पतीने पत्नी आणि मुलाची हत्या करून पलायन केल्याची धक्कादायक घटना उघडकीस आली आहे. या घटनेने परिसरात खळबळ माजली आहे,.घटना ठाण्यातील कासारवडवली साईनगर घडली आहे

ठाणे शहरातील कासारवडवली येथे हि घटना आज सकाळी घडली आहे. या घटनेत भावना अमित बागडी तसेच खुशी अमित बागडी (वय ६) आणि अंकुश अमित बागडी (वय ८) अशी मृतांची नावे आहेत. मृत भावना हिचा पती अमित धर्मवीर बागडी यानेच क्रिकेटच्या बॅटने तिघांची हत्या केल्याचे प्राथमिक चौकशीत समोर आले आहे. (Thane Crime) दरम्यान अमित याला दारू पिण्याचे प्रचंड व्यसन असल्या कारणाने भावना ही त्याला सोडून दीर विकास बागडीसोबत काही दिवसांपासून राहत होती.

तीन दिवसांपूर्वी अमित आला मुक्कामी

पत्नी राहत असलेल्या ठिकाणी तीन दिवसापासून आरोपी अमित हा पत्नी आणि दोन मुले यांना भेटण्यासाठी म्हणून आला होता. दरम्यान आज सकाळी अमितचा भाऊ विकास बागडी हा नेहमीप्रमाणे सात वाजता त्याच्या हाउसकीपिंगच्या कामासाठी गेला. त्यानंतर साधारण साडेअकराच्या सुमारास तो घरी परतला असता त्याला घरात भावना व दोन्ही मुले हे मृतावस्थेत आढळून आले. त्यांच्या डोक्याजवळ क्रिकेटची बॅट दिसून आली. यानंतर पोलिसांना घटनेबाबत माहिती देण्यात आली.

आरोपी पतीचा शोध सुरु
आई व दोन मुलांची हत्या झाल्याची माहिती सकाळी कासारवडवली पोलीस ठाण्याला मिळाली. कासारवडवली पोलीस ठाण्याचे पथक आणि फॉरेन्सिक टीम कासारवडवली गावात घटनास्थळी पोहोचली आणि तपासाअंती पतीनेच पत्नी व दोन मुलांची हत्या केल्याचे निष्पन्न झाले. क्रिकेटच्या बॅटने बेदम मारहाण केली. सध्या पोलीस कसून तपास करत असून आरोपींना लवकरात लवकर अटक करण्यात येईल; असे पोलीस उपायुक्त अमरसिंह जाधव यांनी सांगितले आहे.