लैंगिक अत्याचाराचा प्रयत्न फसल्याने नराधमाने केले असे …..

पुणे / विशेष प्रतिनिधी

महिला आणि मुली कुठेही सुरक्षित नसल्याचा प्रकार त्यांच्या सोबत घडणाऱ्या घटने नंतर समाजापुढे येतो. अशा वेळी समाज अशा घटनांची भर्त्सना करण्यापलीकडे काही करत नाही. फार फार तर मृत महिला किंवा तरुणीसाठी कॅडल मार्च काढून मृतकाला श्रद्धांजली  वाहण्या पलीकडे काही करत नाही. यामुळे अशा प्रकरणाची संख्या वाढत आहे. अत्याचारात अपयशी झालेल्या एका आरोपी कडून महिलेची हत्या करण्याचा धक्कादायक प्रकार समोर आला आहे.

पुणे शहराच्या बाहेरील भागात असलेल्या हडपसर-सासवड रोडलगतच्या वडकी परिसरात एका अनोळखी महिलेच्या निर्घृण हत्येचा धक्कादायक प्रकार उघडकीस आला आहे.

ही घटना 3 मार्च रोजी उघडकीस आली. दिवे घाटाच्या पायथ्याशी वडकी गावातील एका गोदामाजवळील मोकळ्या जागेत 30 ते 40 वर्षे वयोगटातील महिलेचा मृतदेह रक्ताच्या थारोळ्यात आढळला. सुरुवातीला मृत महिलेची ओळख पटत नसल्याने तपास अधिक गुंतागुंतीचा झाला होता. स्थानिक नागरिकांनी दिलेल्या माहितीनंतर पोलिसांनी घटनास्थळी पंचनामा करत तपास सुरू केला.

तपासादरम्यान परिसरातील CCTV फुटेजची बारकाईने तपासणी करण्यात आली. या तांत्रिक तपासातून पोलिसांना एका संशयित व्यक्तीची हालचाल दिसून आली. त्यानंतर पोलिसांनी वडकी परिसरात राहणाऱ्या प्रकाश बिभीषण माने (वय 29) याला ताब्यात घेतले. चौकशीत त्याने गुन्ह्याची कबुली दिली.

आरोपीने दिलेल्या माहितीनुसार, त्याने महिलेवर लैंगिक अत्याचार करण्याचा प्रयत्न केला. मात्र महिलेने त्याला तीव्र विरोध केला. यामुळे संतापलेल्या आरोपीने तिचा गळा दाबला आणि जवळील दगडाने डोक्यावर वार करून तिची हत्या केली. त्यानंतर घटनास्थळावरून पळ काढला.

पुणे शहराच्या वेगाने वाढणाऱ्या उपनगरांमध्ये अशा निर्जन भागांची संख्या वाढत असल्याने महिलांच्या सुरक्षेचा प्रश्न पुन्हा एकदा समोर आला आहे. औद्योगिक गोदामे, मोकळी मैदाने आणि कमी वर्दळीचे रस्ते यामुळे रात्री किंवा पहाटेच्या वेळी सुरक्षिततेची समस्या अधिक गंभीर बनते.

या प्रकरणामुळे स्थानिक प्रशासन आणि पोलिसांवर अशा भागांमध्ये CCTV, प्रकाशयोजना आणि गस्त वाढवण्याची गरज अधोरेखित झाली आहे. तसेच नागरिकांनीही संशयास्पद हालचाली दिसल्यास त्वरित पोलिसांना माहिती देणे महत्त्वाचे असल्याचे तज्ज्ञ सांगतात.