दिशा सालियान हिच्यावर सामूहिक बलात्कार करून तिची हत्या : निलेश ओझा

मुंबई / विशेष प्रतिनिधी 

                   दिशा सालियान हिचा मृत्यू आकस्मिक नसून तिच्यावर सामूहिक बलात्कार झाला आणि तिची हत्या करण्यात आली असा दावा दिवंगत दिशा सालियान हिच्या वडीलांचे वकील निलेश ओझा यांनी केला आहे. दिशा हिचे वडील आज बीकेसी येथील सीबीआय कार्यालयात पोहचले आणि त्यांनी आपला जबाब नोंदवला. 

 हे दोघे दुपारी 2 च्या सुमारास सीबीआय कार्यालयात पोहोचले आणि जबाब नोंदवण्याची प्रक्रिया सायंकाळी 6.30 च्या सुमारास पूर्ण झाली. सीबीआय कार्यालयातून बाहेर पडताना वकील निलेश ओझा यांनी एक गंभीर दावा केला.

निलेश ओझा यांनी आरोप केला की, दिशावर सामूहिक बलात्कार करण्यात आला आणि त्यानंतर तिची हत्या करण्यात आली. ओझा यांच्या म्हणण्यानुसार, सतीश सालियन यांनी या घटनेत सहभागी असल्याचा संशय असलेल्या सर्व व्यक्तींची नावे सीबीआयला दिली आहेत. या यादीत अनेक मोठ्या व्यक्तींचा समावेश आहे. तसेच, सुरुवातीचा तपास करणाऱ्या पोलीस अधिकाऱ्यांनी संपूर्ण सत्य दडपण्याचा प्रयत्न केल्याचा आरोपही ओझा यांनी केला.

ओझा यांनी असाही दावा केला की, अभिनेता सुशांत सिंह राजपूत आणि दिशा सालियन यांच्या मृत्यूची प्रकरणे एकमेकांशी थेट संबंधित आहेत. त्यांनी सांगितले की, त्यांच्याकडे एका माजी पोलीस अधिकाऱ्याची ‘एक्स्ट्रा-ज्युडिशियल कबुली’ (न्यायालयाबाहेरील कबुली) उपलब्ध आहे, ज्यातून सीबीआयचा तपास पुढे सरकताना अधिक तपशील समोर येऊ शकतात.

माध्यमांशी बोलताना दिशाचे वडील सतीश सालियन म्हणाले की, त्यांनी सर्व संबंधित तक्रारी आणि माहिती सीबीआयकडे सादर केली आहे. या प्रकरणात ज्यांची भूमिका होती, त्या सर्वांची माहिती तपास यंत्रणेला देण्यात आली असून लवकरच सर्व तपशील सार्वजनिक केले जातील, असे त्यांनी सांगितले.

उल्लेखनीय आहे की, 8 जून 2020 रोजी मालाडमधील एका गृहनिर्माण संस्थेच्या (हाऊसिंग सोसायटी) 14 व्या मजल्यावरून पडून दिशा सालियनचा मृत्यू झाला होता. सुरुवातीला, मुंबई पोलिसांनी या प्रकरणात कोणताही घातपात किंवा कट नसल्याचे सांगून तपास बंद केला होता. मात्र, हा मृत्यू संशयास्पद वाटल्याने दिशाच्या वडिलांनी मुंबई उच्च न्यायालयात धाव घेतली होती आणि सीबीआय चौकशीची मागणी केली होती. उच्च न्यायालयाच्या निर्देशानंतर, सीबीआयने आता एफआयआर (FIR) दाखल केला असून या प्रकरणाचा नव्याने तपास सुरू केला आहे.