वाचा  तीन आठवड्यात कुठे झाला 220 मुलांचा मृत्यू 

               एकिकडे पाकिस्तान मध्ये महागाईने भयंकर रूप धारण केले आहे. तर दुसरीकडे तेथे पसरलेल्या एका आजाराने गेल्या तीन आठवड्यात 220 बालकांचा मृत्यू झाला आहे. त्यामुळे पाकिस्तान च्या पंजाब प्रांतात घबराहट पसरली आहे.

पाकिस्तानचं काळजीवाहू सरकार म्हणतं, की यातल्या बहुतांश बालकांचा मृत्यू कुपोषणामुळे झाला आहे. न्यूमोनिलाया प्रतिबंध करणारी लस घेतलेली नसणं हेदेखील मुलांच्या मृत्यूमागचं एक कारण असल्याचं सांगितलं जात आहे. मृत्यू झालेल्या मुलांची रोगप्रतिकारशक्ती अर्थात इम्युनिटी पॉवर खूप कमी होती. या परिस्थितीच्या पार्श्वभूमीवर, पाकिस्तानातल्या पंजाब सरकारने 31 जानेवारीपर्यंत शाळेत सकाळच्या वेळेत वर्ग न भरवण्याचे आदेश दिले आहेत. 220 मुलांचा मृत्यू झाल्याची आकडेवारी पाकिस्तानच्या सरकारने जाहीर केली आहे; मात्र ती सरकारी आकडेवारी असल्याने प्रत्यक्षातला मृत्यूंचा आकडा याहूनही अधिक असू शकतो, अशी भीती व्यक्त केली जात आहे. त्यामुळे तिथे चिंतेचं वातावरण आहे.

सध्या पाकिस्तानात कडाक्याची थंडी पडत आहे. त्यामुळे न्यूमोनियाच्या पेशंट्सच्या संख्येत सातत्याने वाढ होताना दिसत आहे. एकट्या लाहोरमध्येच न्यूमोनियामुळे 47 जणांचे मृत्यू झाले आहेत. या वर्षाच्या सुरुवातीपासून म्हणजेच एक जानेवारी 2024पासून पाकिस्तानात आतापर्यंत सुमारे साडेदहा हजार जणांना न्यूमोनिया झाल्याचं स्पष्ट झालं आहे. हे निश्चितच चिंताजनक आहे.

न्यूमोनियामुळे सातत्याने होत असलेल्या मृत्यूंमुळे पाकिस्तान सरकारपुढे असलेली आव्हानं वाढत चालली आहेत. गेल्या वर्षीही पाकिस्तानात न्यूमोनियामुळे मृत्युमुखी पडलेल्यांची संख्या कमी नव्हती. गेल्या वर्षी 990 पाकिस्तानी नागरिकांचा न्यूमोनियामुळे मृत्यू झाला होता. नागरिकांनी आजूबाजूचा परिसर स्वच्छ ठेवावा, मुलांना ऊबदार कपडे घालायला द्यावेत, असं आवाहन सरकारने नागरिकांना केलं आहे.